't Lof van Cupido

Met verscheyde vrolijcke en minnelijcke deuntjens

[p. 109]

Amarils Velt-deuntje,

Stemme: Weest Nimphe gegroet,, van die u moet.

Den Harder die,, onder 'tghebie
Van mijn Heer sijn Vee te grasen drijft,
'tVerwondert my waer hy dus langhe blijft,
't Was hier gheseyt,, maer hy verbeyt
Veer over den bestemde tijdt,
Of Multi oock wel een ander vrijt,
'Kben onghewoon dat hy soo langh vertoeft,
En dat hy sijn Amarille bedroeft,
Waer aen dat het schort can ick niet bevroen,
En dat hy sijn Schaepjes hier niet comt voen.

[p. 110]

 

Het is hooch dagh,, 'k hoor gheen ghewach

 

Van Harders pijp of Schaepjes gheblaet,

 

Waer heen of mijn harder weyden gaet,

 

'k Hoor gins 'tghetuyt van Multis Fluyt

 

Harwaerts comt hy sijn vee dryven heen,

 

Amarille wilt hem te ghemoet treen:

 

Neen neen Amaril ghy u schande doet

 

Dat ghy een Harder wilt gaen int ghemoet,

 

Blijft staen, ist dat hy van harten u mint.

 

Soo sal hy wel comen daer hy u vint.

 

Nu Amaril,, en swijcht niet stil,

 

Maer hooren laet u met een nieu liedt,

 

Op dat Multi u hier sitten siet,

 

Nu Schaepjes soet,, u selven voet

 

En weyden gaet met Multis vee,

[p. 111]

 

Terwijl hy hem hier comt rusten mee,

 

U harder heeft u ghesien harderin,

 

Gaet wilt hem toonen doch wedermin,

 

Sijn Schaepjes drijft hy opt spoedichste voort,

 

Nu hy sijn Amaril heeft ghehoort.

 

Ach Multi ick,, bevaen met schrick

 

Was, als ghy hier niet en quaemt int Velt,

 

Doch uwe comst heeft my te vreen ghestelt,

 

U Lam'ren al,, groot int ghetal

 

Laet die weyden in het groene gras,

 

En Amarille troost, die bedroeft was,

 

Om dat ghy niet quaemt daer ghy had' gheseyt,

 

En al te langh over den tijdt verbeyt

 

Had, en Amaril bidt Multi seer,

 

Dat hy hem by haer comt setten neer.

Al met der tijdt.