't Lof van Cupido

Met verscheyde vrolijcke en minnelijcke deuntjens

[p. 51]

Drinck Liedeken,

Stemme: Ballette d' Alekmaer.

Wonder ist, dat wy hier sijn soo stil, en ghene vreucht hanteeren,
Daer so soet geselschap te samen is vergaert,
'tSa laet ons, nu eens ghelijckerhant, de blyschap gaen vermeeren,
Met de soete vocht die ons Bachus heeft ghespaert,
Om dat wy met vreucht, souden zijn verheucht,
En verblijt int midden vande jeucht.

Nu wel aen, ick sal mijn buerman eens, dit glaesje gaen toe bringhen,

Op condicy dat dees Ioffrou my helpen mach,

[p. 52]

 

Met een kus, of dry, aen weder sy, moet ic oock me bedingen

 

Om daer meerder vreucht mee te brengen aenden dach,

 

Wat seght ghy Buerman, ist u wil oock dan,

 

Soo set hier u kleynste vingher an,

 

 

 

Dese zijn, en dese soete traen, baert wonder deur sijn crachten

 

Wanneer hy is geleyt ter plaetse daer hy hoort,

 

Sy verheucht de gene die steets treurt, en is in swaer ghedachten

 

En brenght door syne cracht meenige cluchte voort,

 

D'een die boert en singht d'ander danst en springht,

 

En de dard' veel vreemdicheyts voort brenght.

 

 

 

Ioffrou wilt tot vermaec van ons al van dese wijn wat innen,

 

En tot verquicking van u selven tot de vreucht  Sy drinct

 

En buerman, hier an, soo mooghdy sien hoe dat wy beginnen,

[p. 53]

 

Op dat een yder door den wijn sou zijn verheucht

 

Ioffrou drinct wat meer, is het u begeer,  Sy drinckt

 

Want het glas mach niet gheset zijn neer.

 

 

 

'kWeet gewis buerman dat ghy verlangt na 'tglas om eens te smaken,

 

Vande traen die Bachus inde Herbst schreyt,

 

Om dat ghy sout meerder sijn verheucht, en om u te vermaken,

 

Verdriet het u dat ick soo langhe heb verbeyt,

 

Nu wel ick salt dan, legghen inde man,

 

Voor dat ick hier mijn mont sal setten van.  Hy drinckt

 

 

 

Voor den danck dat dees Ioffrou my hulp, sal ick oock danckbaer wesen,

 

Met soete kusjes dry aen haren rooden mont,

 

Datment glas so vol wederom schonc alst geweest is voor desen,

 

Op dat mijn buerman siet datmen hem niet misgont,

[p. 54]

 

En dat hy soo veel, oock heeft voor sijn deel

 

Want ick weet dat hy wel mach een heel.

 

 

 

Siet buerman dat ghy dit brengt so voort ghelijck ick heb ghedane,

 

Op dat yder proeft van dese France vocht,

 

Set niet neer, wat 'tglaesje dat en mach niet lange blyve staene,

 

Maer het moet terstont weer werden voort gebrocht,

 

Soo ghy anders doet, soo weet dat ghy moet

 

Noch een glaes uyt drincken tot u boet.

Al met der tijt.