|
| |
Opten woonsdach. Matt .xx.
Doen ginc tot hem de moeder der kinderen zebedei met haer sonen, ende viel voor hem neder, biddende yet van hem, ende hi sprac tot haer: Wat wilstu? Si sprack tot hem: Laet dese mijn twee sonen sitten in v rijck die een tot dijn rechter hant, ende die ander tot dijn luchter hant. Jesus antwoorde ende sprack: Ghi en weet niet wat ghi bidt. Moecht ghi drincken den kelck dien ick drincken sal? [J ij vo] ende v laten doopen met het doopsel
| |
| |
daer ic mede gedoopt werde? Si seyden hem: Ja wel. Ende hi sprack tot haer: Minen kelc suldi drincken, ende met dat doopsel daer ic mede gedoopt werde sult ghi gedoopt werden. Mer dat sitten tot mijnder rechter ende luchter hant en is niet in mijnder macht v te gheuen, mer dien dat bereyt is van minen Vader. Doen dat die thien hoorden, worden si toornich op die twee broeders. Ende Jesus riepse tot hem ende sprac: Ghi wetet, dat die weereltlike vorsten heerscappie hebben, ende de grootste ghebruycken haer macht: so en salt niet onder v sijn, maer wil yemant onder v groot sijn gheacht, die sal sijn v dienaer, ende die daer wil die ouerste sijn, die sal v knecht sijn. Ghelijc als de sone des menschen niet en is ghecomen dat hi hem wil laten dienen, mer dat hi dienen wil.
[J iij ro] Dese twee sonen hadden gehoort dat Christus Petro die slotelen belo eft hadde, ende dat hi van sittene opten .xij. stoelen geseyt hadde etc. Waer wt si vermoeden, dat Christus een wtwendich rijc soude hebben. Ende want si noch vleesch ende niet gheest waren, so begeerden si hoocheyt ende heerschappie, Gelijk het vleesch, welck gheen ander rijc en verstaet, dan tijtlic, altoos grootheyt ende heerschappije begheert, om welcken te vercrijgen dese twee kinderen haer moeder hebben toe ghemaect, dat
| |
| |
si haer ymmer aen Christo heerscappie souden vercrijgen, waer in haer de moeder geerne geuoech was, want natuere is so eygensoeckelic, dat si niet alleen geerne en heeft dat si domineren mach, mer ooc die hare, meynende dat si ymmer daer wat af te badt sal hebben, Waerom si haer dier moeyten getroost, meynende dat si wel een woort int vat aen Christo sal hebben, omdat hi haer maech na den vleesche was. De blinde natuere waent dat God vleesch ende bloet aen sal sien, als si doet, mer neen hi, so hi wel Marc .iij. Luc .viij. bewijst, hi achtse hem naerder die den wille sijns Vaders volbrengen, dan die sijn moeders ende broeders na den vleesche waren of hieten. Dese begeerte van hoochheyt is der bedoruender natueren aengeerft van onsen eersten ouders, die niet te vreden en waren metten edelen staet daerse God in gestelt hadde, mer si begeerden hooch te sijn als goden, wetende goet ende quaet Gen .iij. Maer so si hooger ende heerliker begheerden te sijn, hoe si dieper vernedert [J iij vo] sijn, also wel blijct Gene .iij. Also dat si (so Dauid seyt Psal .xlviij.) den beesten gelijc geworden sijn. Hier af is ons dese duuelsche begeerte aengeerft, also dat wi altoos heerlick ende hooch willen sijn, het si van buyten ende van binnen. Hoe seer dat Christo dat mishaecht, dat heeft hi wel metten exempel bewesen, dat hi geenen hooghen heerliken staet en heeft aengenomen, maer den alder verworpensten staet die noyt mensche op deser aerden hadde, ende en heeft noyt na hoocheyt ghestaen, maer hi vluchte doen si hem Coninc wilden maken Johan .vi. Ende heeft altoos na dat verworpenste gestaen, also dat hi wel inden .xxi. Psalm seyt. Ic ben een wormken ende gheen mensche. Hierom so en heeft hi die moeder der voorschreuen kinderen niet willen verhooren, ende heeft altoos groote neersticheyt gedaen,
| |
| |
om sulcken valschen begeerte wt de herten sijnder discipulen te roeyen. Want dat en is den wech niet waer door men tot God gaet, maer totten Duyuel, die ooc God ghelijc wilde sijn, waerom hi verstooten wert inden afgront der hellen. Daerom so keerde hem Christus tot desen tween sonen, ende seyde tot haer. Ghi en weet niet wat ghi bidt, want ghi begeert weereltlike hoocheyt in mijn rijck, mijn rijck en is van deser weerelt niet, ende aen mijn rechter ende slincke side in mijn rijcke, en is anders niet dan dalder verworpenste ende armste om mijnder liefden te werden naest mi in deser tijt. Tot welcken rijc men door den wech des cruycen coemt, tot mijn rijck en is [J iiij ro] gheenen anderen wech, Ghelijc Actu .xiiij. staet. Door veel tribulatien moeten wi ingaen (als door den eenigen wech) in dat rijc der hemelen. Lu .xxiiij. Christus moest lijden, ende also in sijns selfs rijc comen, in welc lijden hem niemant gelijc gheweest en heeft, ende heeft den kelc des lijdens totten heffe oft ghiste wt ghedroncken. Van desen kelc vraechde Christus oft si dien kelc wel souden mogen drincken, dien hi drincken soude? willende daer mede te kennen geuen, dat niemant des rijcs Christi deelachtich en mach werden, dan die den kelc Christi drincken, Noch erfgenamen Gods ende mede erfgenamen Christi, het en si dat si mede ghesellen sijns lijdens ende arbeyts ende sijnder gelatenheyt sijn. Si antwoorden stoutelic: Ja, wi mogen den kelc wel drincken. Merct hier de vermetentheyt der hoouerdiger natueren, die niet en ontsiet wat si lijdt, op dat si tot hoocheyt ende heerscappie soude mogen comen, ende niet eens aen en merct, oft sijt soude vermogen of niet, mer antwoort terstont vermetelic, Ja. Mer die alder stoutelicste beroemen dat sijn de alder blootste inden strijdt, ende alder eerst veltuluchtich int proeuen,
| |
| |
ghelijc wel blijct aen S. Peeter ende ooc aen dese selue kinderen, die alle wech liepen, ende deene liet den mantel vallen, ende lieten Christum den kelck alleen drincken, Want si stonden op haer selfs cracht, die niet dan een ghebroken riet en is, ende die daer op lenet die moet vallen, ende hem daer toe swaerlick quetsen, Isaie .xxxvi. Welck Christus wel [J iiij vo] bekende, waerom hi haer den kelc niet terstont en gaf te drincken, mer hi seyde, Ghi sulten noch drincken, mer tot mijnder rechter en slincker siden en behoort mi niet toe te gheuen na den vleesch, waer na ghi alleen maechscap rekent, mer dient bereyt is van mijnen hemelschen Vader. Als die ander thien Apostelen dit hoorden, namen sijt qualijc, ende ooc noch vleesch sijnde, hebben sij haer benijt. Wereltlike heerscappie heeft so vele benijders datter seer moeylic toe is te geraken. Merom dat Christus, begeerte der eeren ende benijden of afgonste wt beyde den partijen soude wt wortelen, so heeft hi haer te kennen gegeuen, hoe grooten onderscheyt datter is tusschen den wereltliken rijcke, ende den Euangelischen rijcke, Die int wereltlike rijc de houerdichste, heerlicste is, die wort de grootste geacht, mer die int Euangelische rijc de alder ootmoedichste is, die is de meeste daer in. Op dat Christus dese salige leeringe in al der Apostelen ende ooc alder geloouiger herten soude vast maken ende inplanten, so heeft hi alle de Apostelen tot hem geroepen, seggende. Ghi weet dat de Princen der Heydenen hebben heerschappie daer ouer, ende die groote oeffenen macht daer ouer, also en salt onder v lieden niet sijn, maer die de meeste wil sijn, die sal uwer alder dienaer sijn, ende die de eerste onder v lieden wil sijn, die sal uwer alder knecht sijn. Waer inne onse Heere claerlic te kennen gheeft, dat die alder dienaer is dat die
| |
| |
de meeste int rijc des Euangelijs is, ende [(J v) ro] die alder menschen knecht wert, die is de eerste in dat rijc, welc al contrarie den wereltliken rijcke is, Mer Christus en wil niet dat deen Christen mensche heerschappie ouer den anderen sal hebben mer alleen dienst. Daerom sijnt al Heyden die begeeren te domineren, Ende ten is niet mogelic dat een Christen mensche soude sijn ende bliuen, die wil domineren, want Christus seyt Math .xxiij. Dat wi alle broeders sijn. Hierom so moeten de ouersten daer op toe leggen, dat si met haerder macht ende ouerheyt den naesten dienen, ende haer seluen de eere niet aen en dragen, mer den ghenen te profijte [sijn] daer si ouer sijn gestelt, den verdructen ende de goede beschermende vanden ghewelt der quaden, ende de quade corrigerende. Mer de geestelike Prelaten oft ouerste sijn alleen dienaren des godliken woorts, dat si dat puerlic vercondighen ende daer mede straffen, Want dat is dat sweert des geests, so Paulus seyt Ephe .vi. het welc heerschappie ouer den geest des menschen heeft, Als de mensche daer niet af en houdt, vallende in openbaer misdaden, so moet hem dat wereltlike sweert straffen, waer mede men de quade weeren moet, op datmen alleen de handen ende leden daer mede bedwinge, ist datmen dat herte niet geweeren en can metten godliken woorden, Aldus moeten alle Prelaten dienaers sijn, sullen si Christene sijn, Ghelijc Christus seyt, dat hi niet en is gecomen om ghedient te worden, mer om selue te dienen, ende sijn leuen voor vele te geuen. Also souden alle Christen men- [(J v) vo] schen deen den anderen dienen, met lijf ende leuen, door goet ende eere, Dat Christus de groote crancheyt van sijnen Apostelen heeft geleden, ende die vaderlick daer wt gheholpen, is tot onsen grooten troost ende leeringhe, dat wi hem niet
| |
| |
en sullen houden als eenen strangen rechter, maer hem aenueerden als eenen ghenadighen Vader dat hi ons niet verwerpen en wilt, maer also vaderlic met ons om gaen, als wi hier hooren dat hi met sinen discipulen so lieflic ende vriendelic om gaet ende dat hise saechtelic onderwijst, ende nochtans niet en verwerpt, Op dat hi ons daer mede ooc soude leeren, dat wi onsen naesten ooc vriendelick souden sijn, ende ons beste doen hem wt sinen sonden te helpen, Sijnse heymelic, so sullen wi swijghen, ende decken roc ende mantel daer ouer, Want brengen wi dat wt, so vallen wi in Gods oordeel, dat wij openbaren dat God alleene weet, ende tusschen hem ende ons sullen wij hem straffen, maer niet verwerpen. Want wij sijn alle vanden seluen deech ghebacken, daer hoeren ende boeuen af ghemaect sijn, dat wij staen, dat is alleen die ghenade Gods, anders staet onse duechdelicheyt op eenen stroo halm, ende valt gheringhe daer henen. Maer is de sonde openbaer, so bewijst die liefde daer oock, ende waerschoudt, straft ende brenghet weder ter rechter straten, ende helpt also veel als ghi vanden Heere ghehebben cont, welck hi ons verleene tot sijnder eeren eerlicheyt Amen.
|
|
Auteursrecht onbekend