|
| |
Opten dinxdach Mathei .xxiij.
Doen sprac Jesus totten volcke ende tot sinen discipulen seggende: Op Moyses stoel sitten de scriftgheleerden ende Phariseen, al dat si v seggen dat ghi houden sult, dat onder houdt ende doetet, mer na haren wercken en sult ghi niet doen, want si seggent wel, ende en doens niet. Ende si binden sware ende ondraechlike borden ende leg- [(H vij) vo] gense den menschen opten hals, mer si en
| |
| |
willen die selfde met haren vinger niet roeren. Ende si doen alle hare wercken, op datse vanden lieden ghesien werden, si maken breede wetbrieuen ende groote somen aen haer cleederen, si sitten geerne bouen aen ter tafelen ende inder scolen, ende hebben geerne datmen se groet op die marct, ende vanden menschen Rabbi gheheeten. Maer ghi en sult v niet Rabbi laten heeten, want een is v meester Christus, ende ghi sijt al broeders. Ende niemant sal vader heeten opter aerden, want een is uwe vader die daer inden hemel is. Ende ghi en sult v niet laten meesters heeten, want een is v meester Christus. Die daer is die grootste onder v, die sal v dienaar sijn. Want wie hem seluen verhoocht, die sal vernedert werden, ende wie hem vernedert, sal verhoocht werden.
Christus leert, wien ende hoemen gehoorsaem sal sijn, op dat nyemant bedrogen en werde vanden [(H viij) ro] valschen leeraers die haer selfs droomen leeren. Ende seyt, die op Moses stoel sitten, dat sijn die leeren dat Moses gheleert heeft. Moses en heeft niet wt hem seluen geleert, mer so hem God beual, Ende daerom, al dat si v wt Moses leeringe seggen, dat houdt ende doet, niet als oft v een mensche seyde, maer oft God selue tot v sprake, want dan en sijnt haer woorden niet, mer Gods woorden door
| |
| |
Mosen gesproken. Waert dat ghijt dan niet en hielt noch en dedet, so en wederstont ghi haer niet mer God, gelijc Moses in Exod .xvi. V murmuratie en is niet tegen ons, mer tegen den Heere. Want daer si om murmureerden, dat en hadde haer Moses noch Aaron niet gheboden, mer God doer haer. Daerom, al en houden sijt niet dat si v seggen wt Mosen, ghi en moecht na haer doen niet sien noch doen, mer na die woorden Gods. Si binden sware packen te samen, dat is, si binden bi den swaren last der wet, die aen haer seluen meer dan te swaer was, gelijct blijct Actuum .xv. haer menschelike insettinge, ende leggen die op de scouderen der menschen, welc si met haren vinger niet en willen roeren. Mer daerom en mochte ghi niet laten te doen, dat v God doer Mosen beuolen heeft. Maer dat ander dat si daer bi gebonden hebben, dat en sijdy niet schuldich te houden. Dat het also te verstaen is, dat betuycht Christus Mathei. int .xv. capit. wt Esaias .xxix. Ende ghelijck die Joden schuldich waren den Scriben ende Phariseen ghehoorsaem te sijn [(H viij) vo] in al dat God doer Mosen geboden hadde. Also sijn wi den Prelaten nv schuldich gehoorsaem te sijn in al dat Christus geboden heeft. Welck ons God beual Mat. int .xvij. seggende. Dit is mijn beminde sone, hoort hem. Ende als die Prelaten die woorden Christi prediken, so sijn wij hen schuldich te hooren, niet als haer woorden, mer als die woorden Christi, ende dat meynde Christus, doen hi seyde Luc .x. Die v hoort die hoort mi, want so Christus oock seyt Matt .x. Ghi en sijt niet die daer spreect, mer het is den geest mijns Vaders die in v spreect. Desen geest en spreect geen menschelike woorden, maar die woorden Christi, so Christus Joan .xvi. seyt. Die heylige geest die sal v leeren al dat ic v segge. Daerom alsmen haer dan
| |
| |
hoort, so hoortmen Christum, diens woorden si spreken. Ende also ist al te verstaen, dat inder heyliger scrift vander gehoorsaemheyt der prelaten geseyt is. Als totten Hebre .xiij. Sijt uwen ouersten gehoorsaem, want si waken voor v et c. dat is, als si v leeren dat Christus geleert heeft. Mer als si daer yet bi binden van menschen vonden, dat en is men niet schuldich te houden. Ende al ist dat si seggen, dat int eerste boeck der coningen int .xv. staet, dat ghehoorsaemheyt beter is dan offerhande, dat is al vander ghehoorsaemheyt Gods gesproken, also dat capittel claerlic wt wijst. In welcken Samuel Saul seyt: Hoort die stemme des Heeren. Dit seyt de Heere et c. Ende noch Waerom en hebdy die stemme des Heeren niet ge- [J ro] hoort. Wil de Heere oock offerande? Ende niet veel meer datmen sijnder stemmen ghehoorsaem is? want gehoorsaamheyt is beter dan offerande, dat is, het is God veel bequamer datmen sinen woorde gehoorsaem is, dan datmen veel groote ander wercken doe, als hem veel te offeren etc. Siet, so is dat heelic tegen haer, dat si voor haer nemen om den mensche tot haerder gehoorsaemheyt te brengen. Also datter nv oock wel een Samuel mocht comen, ende segghen tot onsen Prelaten. Waerom en hoordi de stemme des Heeren niet, die v (Deu .iiij. ende .xij. Josue .i. ende Prouer .xxx.) beuolen heeft, dat ghi niet tot sinen woorde en soudt doen, noch ooc daer niet af doen. En waert niet veel beter dat ghi de stemme Gods gehoorsaem waert, dan dat ghi contrarie doet ende ghebiet de menschen, dat God niet geboden en heeft? Dit soude de liefde ende tgelooue alder best leeren. Tghelooue en laet niet leeren noch gebieden, dan dat godlick woort, ende de liefde en wil niemant belasten, gelijc si niet belast en soude begeeren te sijn met ander saken, dan met wercken der
| |
| |
liefden, daer ons God mede belast heeft. Waer in ons God een sonderlinge liefde bewesen heeft, dat hi sijn geloouige gheen slauen der menschen, mer alleen der liefden dienaers gemaect heeft, mer so vry ende edel, dat hi niemanden geoorloft en heeft heerscappije ouer de conscientie der geloouiger te hebben, ende dat hise alleen wil regeren ende een Heere daer af sijn wil. Gelijc hi door Paulum Gal .v. belijdt, segghende: Ghi [J vo] sijt tot vrijheyt beroepen, alleen siet toe, dat ghi daer gheen ocsuyne des vleeschs, gulsicheyt, begeerte der wraken oft tijtliker eeren wt en neemt. Welc somige wanen dat te verstaen is, datmen in de vasten gheen vleesch eten en sal, oft desen oft dien dach vasten. Neen, dat en meynt Paulus niet, mer hi meynt datmen daer gheen ocsuyne van vleescheliken sonden wt en neme die God verboden heeft etc. want het en soude anders gheen vrijheyt sijn, welcke vrijheyt hem niemant en sal laten nemen, also dat hi hem van eenighen dingen conscientie soude laten maken, dan die God selue geboden oft verboden heeft. Also Paulus Collo .ij. seyt. Al waert dat ooc alle creatueren geboden oft verboden, so en sal hem een Christen mensche de vrijheyt der conscientien nemmermeer laten nemen, die Christo so diere staet, want om de vrijheyt ons te vercrijgen, so is hi onder de wet ghedaen, so Gal .iiij. staet, Ende is xxxiij. iaer onser alre slaue gheworden, op dat hi ons van alder slauerije der conscientien soude verlossen. Nochtans so Paulus Ro .xiij. leert, so sullen wi der wereltliker ouerheyt ghehoorsaem sijn, in al dat si gebieden om gemeyn profijt ende eendrachticheyt, ende het niet teghen de eere Gods en is. Voort leert ons Christus die valsche leeraers daer aen te bekennen, dat si alle haer wercken doen dat si van de menschen gesien souden sijn, ende daer- | |
| |
om so deden si wercken van heyligen schijn. Ende si beminnen de eerste plaetse aender tafelen, ende de eerste setelen inder scolen, ende
willen meesters ende heylige vaders [J ij ro] gheheeten sijn. Is dat gheseyt vanden ghenen die hoocheyt beminnen, wat salt dan sijn die daerom arbeyden ende ghelt om gheuen, waer wt blijct, dat meester ende doctoren oft licenciaten werden, gheheelic tegen God is. Mer Christus wil dat de sine het vernederste ende verachste ouer al sullen verkiesen, ende dat si niet na hoogen naem en sullen staen, noch dat si haer niet meester noch vader opter aerden en sullen noemen, maer is in yemant eenighe wijsheyt oft vaderlike sorchfuldicheyt, dat si gode daer af sullen eeren ende louen, als van sijn wercken ende ghiften, die hi in sijn creatuerken tot behulp ende dienst der behoeuender ghestelt heeft, welck God selue in ende met ons volbrenghe tot sijnder eeren.
|
|
Auteursrecht onbekend