Princeliicke deuiisen

[p. 435]

CCIII. Pas à pas.

Die stap voor stap treedt, en volherdt
Geraeckt in laetst seer wijt en verdt.

Den Os sal sich in't gaen te geender tijt verhaesten:
Nochtans daer hij wil zijn, comt hij noch wel ten laetsten:

Den mensch ooc die begeert in al sijn dingen spoet,

En haeste sich niet seer, maer gae al voet voor voet.

De haesticheyt is quaet in alle menschen wercken,
Mits dat sij heur gebreck niet can noch wil bemercken:

Maer die met sachten sin sijn saecken wel leydt aen,

En dan gestadich werct, het sal hem wel vergaen.

REynier, Coninck van Sicilien, begeerende datmen wist dat hij noch hope

[p. 436]

hadde om allengeskens veel grooter Heer te worden, dan hij was, ende dat hij comen souden ten eynde van alle sijn voornemen, dede maken een Devijs van eenen Os, met sijn Wapenen op den hals oft neck verheven staende, ende de volgende Fransche woorden daer bij, Pas à pas: al oftmen op't Neer-Duytsch seyde, Voetken voor voetken, oft Stap voor stap: Gevende daer bij te verstaen, dat hoe wel den Os heel langsaem ende properlijck voortgaet, nochtans metter tijt wel eenen seer langen wech afleggen, ende verre comen can.