Princeliicke deuiisen

[p. 411]

CLXXXIX. ΑΠΛΑΝΟΣ.

Den goeden rechter moet vrij zijn van dvvalen,
Wil hij in't rechten danck oft prijs behalen.

ΑΠΛΑΝΟΣ

Het Swaert is een nut dinck, gebruyct met goet verstant,
Dat een gantsch Coninckrijck in vrede can gehouwen:
Maer alsset eens geraect in roeckeloose hant,
Dan baert-het niet dan crijg, dan commer ende rouwen.

Daerom en sal een Vorst het Swaert elckeen niet geven:

Maer een soo vast verstant, dat nergens in en dwaelt,
Het welcke dat trect wt, en weder nae hem haelt
Nae heysch van recht, soo elck de doot verdient, oft t'leven.

[p. 412]

DEn ghewapenden Arm, mettet Swaert inde hant, ende het Griecx woort daerom ghewimpelt, te weten ΑΠΛΑΝΟΣ, dat is, Niet-dolende, gheeft te kennen, dat mijn Heer den Connestabel, altijts wel ende ghetrouwelijck ghedient heeft den eenen ende den anderen Coninck, soo wel in tijden van vrede als van oorlog, hebbende ghedurichlijcken ghehadt soo groot geluck, wetenschap, ende verstant, dat hij soo langhen tijt seer voorspoedichlijcken bestiert ende gegouverneert heeft de landssaken van Vranckrijck.