Princeliicke deuiisen

[p. 401]

CLXXXIII. Festina lentè.

Verhaest u traeghelijck, Beraeydt u dagelijck, Eer ghij wat nieuws doet:
Want lang versinnende, Met vlijt beginnende, Vercrijght men voorspoet

Een Vorst die haest ghelooft het gheen dat elck hem seydt,
Doet dik, oft laet geschien dat hem in't laetst is leydt.

Daerom moet elcken Prins Augusti leer naevolgen.

En wesen niet te haest becommert oft verbolgen:

Als hij hem traechlijck haest, en haestlijck traegh betoont,
Dan wort tgheen dat hij doet noint met berouw gheloont:

Maer wilt hij allesins oft cruypen, oft ooc vliegen,

Soo sal een swaerlick endt sijn aenslach meest bedriegen.

DEn goedertieren Prins ende Keyser Au-

[p. 402]

gustus, willende betoonen hoe ghesett, ghematicht, zeegbaer ende stil dat hij was in alle sijn doen: niet lichtelijck gheloovende het ghene dat hem sijne hovelinghen oft ander lieden quaemen overdragen, aenclagen, oft in d'oore blasen (door welck ghebreck de Princen ende Rechters dickwijls menich mensch groot onghelijck doen, oft laten gheschieden) dede slaen, oft munten, onder veel ander, in een van sijne Medaelien oft Penninghen van Goudt, eenen Wijwouter, enden eenen Creeft: beteeckenende metten Wijwouter de haesticheyt, ende metten Creeft de Langsaemheyt oft Tragicheyt: welcke twee dinghen te samen, maecken een Maticheyt, die de Princen seer betaemelijck iae hoochnoodich is in meest alle heure saken.