Voorwaer als Godt ons helpt, wie can ons teghen strijden?
Dan isser niet op aerd swaer voor ons om te lijden.
Gheluckich is den mensch die sulcken hulp geniet:
Waer hij hem keert oft went, hij is vrij van verdriet.
VVij wenschen all hier om, met woorden: metter daet
En dencken wij op Godt niet, alst wel met ons gaet:
Alleen als tegenspoet ons clagen doet en kermen
Dan denctmen eerst, Wouw God ons van dit quaet beschermen!
SInte Pauwels (als staet in het 28 capittel van de Wercken der Apostelen) wesende in het eylant van Malta, wiert ghebeten van een Adder-slang: dies niet tegenstaende (al wast sake dat de Wilde oft Barbaren van dat lant anders verwachten) hij en hadde gantsch geen letsel van dien beet: maer schuddende sijn hand, dede de slang in't vier vallen. Want inder waerheyt, die Godt helpen wil, daer en is ter werelt niet soo quaet oft soo crachtich dat hem hinderen mach.
Auteursrechtvrij
