Princeliicke deuiisen

[p. 287]

CXXVI. De mal me paists.

Ick voed mij self met quaet, geen goet comt mij voor oogen:
Hoe souw dat van mij comt eenichsints connen doogen?

Den boosen slimmen aert van veel vervloecte menschen
En denct noint om iet goets: dan alle sijne wenschen

Is om iet quaets te doen, oft om iet quaets te sien:

Hij voedt sich self met quaet, iae sal van't goede vlien.

Laet u bij sulcken volck te geenen tijden vinden,
Op dat sij u goet hert door quaetheyt niet verslinden:

Vertellen sij u quaet, dat iemant heeft ghedaen,

Verblijdt u niet, maer segt, Bet had hij't laten staen:

Heeft iemant ongeval, oft is sijn hert in dwalen,
Verheugt u niet, maer wilt hem eer wt doling halen.

Die sich tot goet gewent, het goet gebeurt hem meest.

Godt gund elck-een geluck nae't drijven van sijn geest.

[p. 288]

Anders.

De Laet-cop suygt het bloet dat in't lijf gaet bederven:
Maer hadden wij geen quael, wij souden heur wel derven.

Den quaden leert niet goets, maer voegt sich bij het quaet:

Den goeden siet dat noo, en haestich dat verlaet.

Anders.

Veel zijn alsoo van aert, dat sij in quaet verheugen,
Mits dat sij goet te doen geheelijk niet vermeugen:

Sij slachten dese Cop, die wt des menschen vel

Niet dan het quaet en haelt, dat hem doet groot gequel.

Sien sij dat iemant sneeft in sonden oft elenden,
Sij sullen die van hem met hulp oft raet niet wenden,

Maer voeden heur quaet hert met boosen vuylen aes:

Zijn blij dat heuren vrient rampsalich is oft dwaes.

Der mensch, de wijl ghij meugt, wilt goeden raet aenvaerden,
Verheugt alleen in 't goet: en waer het zij op aerden,

Helpt uwen naesten wt het quaet dat hem belast,

En raedt hem op u best tot tgeen dat hem best past.

Wenscht dat hij mach geluk genieten, en quaet derven,
Soo sult ghij oock gerust en heel geluckich sterven.

EEn Laet-cop, Ventose, oft Busse, daermen bloet mede laet, op de huyt gesett zijnde, en treckt door sijne cracht ende hitte des viers daer niet anders wt, dan het quaet bloet. Ende den quaden mensch, seyde Plutarchus, en leert oft onthoude in sijn hert anders niet dan het ghene dat quaet is in alle dingen.