Princeliicke deuiisen

[p. 268]

CXVII. Poco à poco.

Allengskens vveynich doen tot vveynich, can in't laetst
Volbrenghen datmen noint wel dede metter haest.

Allengskens comt de deugt in een goed-aerdich hert;
En die goet worden wil, allengskens beter wert:

Allengskens moetmen tcruyt begieten en besproeyen;

Allengskens wasset dan, en niemant sietet groeyen.

Den engen hals geeft wt, en neemt het water in
Niet haest, maer metter tijt: soo oock der menschen sin

[p. 269]

 

Vergeet noch leer niet haest, maer datmen 't naeuws can mercken:

 

Dan wat hij heeft geleert, bevintmen aen de wercken.

Anders.

Wilt ghij met grooter haest een enge flesche gieten
Vol water oft vol wijn, t'meest sal ter sijden vlieten:
Het minste salder gaen daer ghij dat nat begeert:
Soo oock die tseffens wil dat eenen iongman leert
Veel dingen groot van waerd, veel consten, oft veel talen,
Die sal in't laetste niet dan schaed' en schand behalen:
Sijn teere ionck verstant van als seer weinich vat:
Maer sal bedijden best, leert hij allengskens wat.

Anders.

Wilt een cloeckhertich helt sijn vijant gaen bestrijden
Te gaer aen allen cant, hij sal niet seer bedijden:

Veel beter waer het dat hij aen d'een sijde quam,

En soo allengskens d'een voor, d'ander nae in-nam.

Voorwaer aldus is t'Rijc van Roomen groot geworden:
Want sij seer selden tsaem veel dingen tseffens porden:

Allengskens zijn sij soo van niet geworden wat,

Allengskens wonnen sij de werelt stadt voor stadt.

GElijckerwijs alsmen de cruyden siet gewassen zijnde, ende voorts gecomen, sonder nochtans te sien datse groeyen: Inder selver voegen machmen oock sien de deugden in iemants herte ghegroeyt zijnde, maer niet groeyen: want heur tragelick aennemen en canmen soo wel niet bevroeyen oft ghewaer worden.