Princeliicke deuiisen

[p. 21]

V. Pignora cara sui.

Sijn costelicken pant heeft Godt voor ons ghegheven,
Wiens Soon ons door sijn doot verleent het eeuwich leven.

Verblint en boos geslacht, en condij niet gelooven
Dat onsen Heer ons Godt sijn beste pant, sijn Soon
Ghelevert heeft ter doot, om onser sonden hoon?
Och Ioden, ghij en doet: uw sonden u verdooven:

[p. 22]

 

Ghij zijt de eerste die de Profecijen crachtich

 

Ghenoten hebt, en hebt self ghesien de Profeten:

 

Maer u versteentheyt groot is in u hert soo machtich,

 

Dat ghy de laetste zijt op dat te willen weten.

VAn het Cruys van den Salichmaker des Werelts, ende van de verholen heylicheyt oft Mysterie van het Sacrament des Autaers, heeft gheprofetizeert Ieremias in sijn 11 capittel, sprekende dese woorden als met een onrechtveerdige stemme wt den mont der Ioden: Mittamus lignum in panem eius: al oft sij seyden, Laet ons hout in sijn broot steken.