Princelijcke deuijsen

[fol. 28r]

Flammescit vterque.

Twee stocken oft tacken van Lauwer boom, wel hert ende tegen malcanderen geslagen, ontsteken (als ons Plinius bescrijft) door den slach, ende geuen vlamme. Tselue doen oock (als veel auteurs beschrijuen) de beenders vanden Leeu. Insghelijcx oock

[fol. 28v]

als twee stercke ende gheweldighe dingen teghen malcander comen, dat en can niet gheschieden dan met groot perijckel. Desen propooste achtervolghende soo ist ghemeene spreeckwoort oock warachtich, als dat sterck teghen sterck gheen goedt voerlaken wesen en mach. Tbeworp van deser deuijsen ghemaect ghelijck S. Andries cruyce, twelcke het voorseyde huys van Bourgongien van ouden tijden heeft ghehadt voor een deuijse, hoe wel datter onderscheyt is int bedietssel van dien.