Princelijcke deuijsen

[fol. 18r]

Plus oultre.

Caerle Keyser vanden Roomschen rijke de vijfde van dien name, voert voor Deuijse twee pilaren, die vanden ouders sijn genaemt

[fol. 18v]

gheweest de Colommen van Hercules. Twelcke waren twee hooghe berghen oft rootsen staende aende zee, ontrent seuenhondert stappen van malcander. Die eenen in Barbarie opde sijde van Affrijcken ghenaemt Abila: dander int Conincrijcke van Granaden opde Spaensche sijde, gheheeten Calpe. Tusschen dese twee rootsen loopt eenen arm vander zee, die men heet die engde van Gibalterre ofte van Siuilien. De Poeten meenen dat deze engde eertijts soude gheweest sijn een gheheele vaste rootse, sluytende gheheel den inganck vander zee: welcke passagie soude gheopent hebben gheweest deur die cracht van Hercules, om daer deur te bringhen de See Oceane inde Leuantsche See. Ende tot een ghedinckenisse van dien, soo werden opgherecht dese twee Colommen, in twee verscheyden deelen vander werelt. Ten anderen om dat van ouer ouden tijden hier voortijts de maniere was, dat groote Princen deden oprechten, als hooghe boghen, oft Colommen tot een ghedenckenisse, ter plaetsen daer sy haerlieder reysen oft pilgrimagien volbrochten (als men leest dat Alexander op veel plaetsen van Asien gedaen heeft) alsoo oock, om dat Hercules ter plaetsen daer dese twee Colommen staen sijn reyse volbracht hadde, meent men dat hy de selue daer heeft doen stel-

[fol. 19r]

len. Want om de waerheyt te segghen, men can niet gheweten oftse daer wter naturen, oft van menschen handen ghemaect sijn. Niettemin soo veel isser af dat blijckelijck ghenoech is, dat daer heeft ghestaen eenen tempel, daer Hannibal sacrificie dede, wesende in meeninghe ende opde reyse, om te gaen voeren orlooghe op Italien: in welcken tempel dat waren twee coperen Colommen, wesende elck acht cubitus hooghe, bewijsende de excellencie van desen tempel: ende dese plaetse wert van veel menschen ghehouden voor het eynde vander werelt. Want daer en is gheen ghedeckenisse dat oyt yemant voorder gheseyt heeft, voor dat desen Keyser Caerle gheregiert heeft, ende dat sijn ondersaten wt Spaengien hebben gheseylt ende gheuonden sommighe eylanden ende plaetsen die men soude moghen bewoonen. Insghelijcx oock die Porteguisen, dewelcke groote conquesten soo wel Oostwaerts als Westwaerts ghedaen hebben. Om welcke vermeerderinghe van sijn palen te kennen te geuen, soo heeft dese voorseyde Keyser ghenomen voor een Deuijse de voorseyde Colommen: hopende noch (als hy seyt) voorder te trecken, ende noch meer lants te conquesteren.