Princelijcke deuijsen

[fol. 10v]

Nutrisco, & extinguo.

De Salamandre in een vlammende vier, was die wapen ofte deuijse van wijlen die edel en grootdadighe Conick Francois, ende daer te voren van zijnen vader Caerle de Graue van Angoulesme. Plinius⁺ schrijft dat dit dier deur sijn groote coude, het vier wtdoet ghelijck een ijs. Andere seggen dattet can leuen int vier, ende het meestendeel seyt, dattet int vier sijn voets-

+ Plinius.

[fol. 11r]

sel haelt. Soo veel isser af dat my wel ghedenct dat ick gesien hebbe een coperen medaille vanden voorseyden Coninck, op de welcke aen deen sijde ghemaect was een Ionghelinck, ende op dander sijde dese Deuijse vanden Salamandre int vier met dese Italiaensche woorden.

Nutrisco il buono, & spengo il reo.

Ten anderen soo hebbe ick oock gesien dese selue Deuijse te Fonteine bleau (wtghescheyden, soo veel ander plaetsen ende Conincklijcke houen, daerse noch op den dach van heden verheuen staet) staen in seer costelijcke tapijtserije, met dese naeruolgende verskens daer by gheuoecht.

Vrsus atrox, Aquilaeq́ue leues, & tortilis Anguis:
Cesserunt flammae iam Salamandra tuae.