Verscheyden bruyloft dichten ende liedekens ghedicht ende gecomponeert by verscheyden gheesten

Clio,

Het anderde liedt: Op de wijse,

O maghet schoon mijn lief, &c.

VErheucht u al iubileert,
Verdrijft droefheyt, wilt u verblyden,
Vrou Bruyt die ghy langh hebt begheert,
Die u gebracht heeft in veel lyden,
Die hebt ghy nu by uwer syden,
Bevanghen gans met uwer min,
Dit ist dat ghy op ander tyden,
Soo vaeck ghewunscht hebt in u sin.

Al hebt ghy eerst wat teghenspoet

Gheleden, tsal nu beter wesen,
Al hebt ghy eerst deur minnen gloet
Ghebrant, dat sal hy u mitsdesen
Wtblusschen end' sal u ghenesen,
Vant vyer dat u soo seer versmacht,
T'is gheen perijckel en wilt niet vresen,
Ghy sult weten desen nacht.

Voorwaer ghy zijt gheluckichlijck.

Dat God u een man heeft ghegheven,
Die in cloeckheyt seer wijselijck,
Te boven gaet end' in zijn leven

[p. 30]

 

Gansch gheen oncuysheyt heeft bedreven,

 

Bemint hem soo salt u wel gaen,

 

Hy sal u oock in liefd' aencleven,

 

Adieu hier meed' heb ick ghedaen.