Aegyptica ofte Aegyptische tragoedie van M. Anthonius en Cleopatra

[fol. B3v]

Stances ter eeren Gvilliam van Nievwelandt.

Ist u noch niet ghenoegh soo constigh uyt te belden
De daden met penceel van soo veel cloecke helden?

Moet ghy met u verstandt en edel soet ghedicht,

Het Antwerpsch schoon Toneel den roem der Violieren
Tot uwen grooten lof soo heerelijck vercieren,

Nu ghy den hooghen pracht van Roomen brenght in't licht?

VVast u noch niet ghenoegh dat wy door v verstonden,
VVar in d'oncuysche min all' valscheydt is beuonden,

En hoe sy van den mensch 't verstandt en reden rooft?

Daer sulcken quaedt uyt spruyt, soo schroomelijck om hooren,
Dat kinders haere moer soo schandigh doen vermooren,

Midts dat den minnaer saen de loghentael ghelooft.

VVast u noch niet ghenoegh dat wy soo constigh wisten.
Het yselijck misbruyck van moorden ende twisten,

Van Nero den tyran? die hem noyt heeft gheschroomt

Te storten vrienden bloedt, te roouen, noch te branden,
In't coelen van sijn hitt', in't wasschen van sijn handen,

Als hy maer inden slaep het minste had' ghedroomt.

Die faem moest oock door u de wereldt ouer vlieghen,
Hoe hem den boosen mensch comt dickwils te bedrieghen,

Die Godts ghebodt veracht, en op sijn cracht betrouwt,

Hy vindt hem dan op't lest verlaeten van sijn vrinden,
Niet wetende waer hy gherustheydt sal in vinden,

Ghebruyckt sijn eyghen sweert, 'twelck hy in't lichaem douwt.

VVy weeten oock door u, all' ons ellendigheden,
Die ghy bevestight hebt met soo veel wijse reden.

VVy weeten oock door u, dat 'swereldts schoonen Niet,

[fol. B4r]

 

All' d'ydelheydt en pracht, als asschen sal verdwijnen,

 

Die soo bedrieghelijck in onse ooghen schijnen,

 

En dat de doodt alleen is d'eyndt van ons verdriet.

 

 

 

Ghy wordt nu alle dagh Poëtelijcksten schilder

 

In dese soete const gheleerder ende milder;

 

Ghy brenght tevoorschijn nu de daedt van Marc Anthoon,

 

Die met sijn trots ghemoet verbreyden wilt sijn paelen,

 

En Cleopatrae val: want siet, Die climt moet daelen,

 

'T welck wel ghebleken heeft aen Phoebi eyghen soon.

Die climt moet daelen.

Nicolaes vander Grootendaele.