Gheestelycke plantaige van gheestelijcke op-climmende boomen

[p. 46]

Sy is besorght voor de resterende reyse, ghemerckt sy inden dool-hof is.

Stemme.
Seght my o soete Herderinne.

1.

Och heere Godt al mijn ghepeysen
Doen my soo veel beroerten aen;
Sy doen my becommert staen
Hoe ick mijnen wech sal reysen
Die hier resteert te doen van mijn
In deze wereltsche woestijn.

2.

K'heb wel ghegaen in mijn beghinnen

Doen ick u nam voor een voorbeeldt;

[p. 47]

 

Maer het heeft my hier verbeeldt

 

K'heb' aensien den wegh der sinnen,

 

Doen is ghedaelt in mijn ghedacht

 

Dat hy my corter tot u bracht.

 

3.

 

Desen wech ben ick in gheganghen

 

Door bosch passaigen, en door velt,

 

Maer als nu staen ick verstelt

 

Eenen dool-hoof compt my pranghen

 

Waer van ick niet en weet den keer

 

D'welck my aendoet druck ende seer.

 

4.

 

Hoe dat ick door naturen leeren

 

Ingae den dool-hof menich-fout,

 

Ick en word' niet voort ghestout;

 

K'blyve altijdt in't selve keeren,

[p. 48]

 

Als ick u haest meen by te syn,

 

K'vinde my verre, van u aenschijn.

 

5.

 

Soo dat ick sie, dat alle weghen

 

Niet recht en gaen tot u voorwaer:

 

Dat wordt ick nu wel ghewaer,

 

Men mach niet volghen t'gheneghen

 

Dat hier uyt ons nature spruyt

 

Want t'bringht ons op den doolhof wt.

 

6.

 

Lof dan o Godt sonder verbeyden

 

Helpt my uyt desen doolhof nu,

 

Mijn hulp' moet commen van u:

 

Wilt my toch hier uyt gheleyden

 

Worpt my van boven eenen draet

 

Waer me mijn hert recht tot u gaet.