Gheestelycke plantaige van gheestelijcke op-climmende boomen

[p. 43]

Sy heeft begheerte om Godt te dienen en om syn Gheboden te onderhauden.

Stemme.
Sarabande du ballet: Of heyligh' Elisabeth in het publiecke

1.

O Liefsten heere wilt my hier ontwinden
Uyt mijne groote wanckelbaericheydt,
Ick hebbe langhe tijdt met alle winden
Ghewaeyt, gheswiert meer dan het my ghereyt.

2.

K'heb hier mijn leven gheoeffent op eerden

[p. 44]

 

Seer woest en onghebonden breet en wijdt;

 

Met cloeckheydt al mijn sinnen hun gheneerden

 

In al het ghene dat ghy niet en syt.

 

3.

 

K'heb nu aen d'een, nu aen d'ander ghevallen

 

Nu d'een nu d'anderen oock af ghegaen:

 

Mijn sinnen waeren als de weirre ballen

 

Sy lieten hun van d'een tot d'ander slaen.

 

4.

 

Maer nu is in my den wille gheresen

 

Van my stantvastelijck te houden hier;

 

K'heb u en uwe wetten uyt ghelesen

 

Waer naer ick leven wil, naer u desier.

 

5.

 

Van nu en oock voort aen, wilt ick niet trachten

 

Naer d'ydelheydt want sy is veel te slecht;

[p. 45]

 

Maer met mijn sinnen al, en mijn ghedachten

 

Sal ick mijn ooghen op u houden recht.

 

6.

 

Aen u soo wil ick my teenemael houwen,

 

Want sonder u en is toch gheen vermaeck:

 

Hoe datmen u meer dient ter goeder trouwen

 

Hoe datmen van u heeft noch meerder smaeck.

 

7.

 

Lof Godt ick hebbe begheeren ghenomen

 

Maer t'is met uwe gracij, ick bekent;

 

Wilt my met gratien noch meer voorcomen,

 

Dat ick t'volbringhen magh, tot inden endt.

FINIS