¶ Van die vroome voysen.
DIe vroomheyt ende geduericheyt des voys machmen bewaren, ist datmen inden beghinne manierlijc ende lancsaem sprekende es, by dyen machment ooc bescheedelijcker segghen ende den auditeurs tijt laten om daer op te denckene Gheen argher dan terstont int beghin seer luyde gaen roepen, want daer by wert terstont den voys gequetst, ende ooc die auditeurs gheoffenderet. Int veruolch van dye redene machmen naer heesch vanden woorden ende sin den voys verheffen, ende dan wederkeeren tot zijn middelmate, want veranderinge sterct den voys, ende behaecht den hoorders mer wacht altijts van luyde crijsschen, twelc meer der vrauwen, dan die statelicheydt der mannen toebetaemt. Int sluyten vander redene ist goet vele zegghen met eenen aseme, dat es met eenen anhoudenden gheduerigen voys, dit versterct den voys, het verscherpt ende verwect wonderlijcke seere den sin vanden ghenen diet hooren, sonderlinghe int eynde, oft conclusie vander sake.
Auteursrechtvrij