Cap. II.
Wat Comeet is, ende eenighe onderscheyt onder de Cometen.
COMA op 't Griex is so veel te segghen als uytgekemde lang hayr, diemen om t'cyraet ende pronckrie laet wassen, daervan heeft dit schijnsel haer name, met eenighe onderscheyt. Want altemets schijnt dat t'hayr rontom uythangt, dan isset eyghentlijck een Comeet; Somtijts gelijckt het een steert, ofte roede, somtijts een baert, dan hietet op t'Griex Pogonias dat is baerdeman. Ende t'Corpus daer dese baerdt ofte steert an vast is, ghelijckt wel een sterre; daeromme wordet oock ghenoemt Stella Comata, stella barbata, ende stella caudata, Dat is een sterre met lang hayr ofte locken, een sterre gebaert, ende een sterre met een steert. Dan by Aristoteles wordt de name van steert niet gebruyckt.