Het Brabandts nachtegaelken, met zijn driederley gesangh, te weten minne-liedekens, herders-sanghen, ende boertigheden

Vryagie-liedt, tusschen een oudt manneken, ende een jonge dochter.

Stem: Janneman en Allemoer. (Oft) Pots hondert, &c.

Hans.

NV Jenneken, mijn soete beck,
Ick bidd’ u staet wat stil.

Ienn.

Wat let u, seght my ouden geck?
Bediedt my uwen wil.

Hans.

Al ’t geldt dat ghy hier liggen siet
Sal voor u sijn beset.

[p. 170]

 

Ienn.

 

Neen, Kael-kop, ick en soeck u niet;

 

Dat ghy soeckt, soeck ick met.

 

Hans.

 

2. Van landt, en zandt, en geldt, en goedt

 

Soo ben ick machtigh rijck.

 

Ienn.

 

Dat acht ick niet, o slechten bloedt,

 

Ick wacht naer mijns gelijck.

 

Hans.

 

Het goedt is daer men wel af vaert,

 

Dus Meysken hier op let.

 

Ienn.

 

Ghy hebt my veel te grijsen baert;

 

Dat ghy soeckt, soeck ick met.

 

Hans.

 

3. Nu Juffrouw, geeft my eenen soen,

 

Ick schenck u al dit geldt.

 

Ienn.

 

Dat sal ick aen een jonger doen,

 

Al had hy niet een spelt.

 

Hans.

 

Gelooft, Lief, dat ick u versoeck

 

Op eer, en naer Godts wet.

[p. 171]

 

Ienn.

 

Wegh, wegh, wegh Hansken Hanghe-broeck;

 

Dat ghy soeck, soeck ick met.

 

Hans.

 

4. Ick sal u koopen wat u lust,

 

En doen dat ghy ghebiedt.

 

Ienn.

 

Neen Vaerken, houdt u doch gherust,

 

Want ghy en dient my niet;

 

Waert ghy maer twintigh jaren oudt,

 

Soo waer ick haest besteedt:

 

Maer nu soo zydy grijs en koudt;

 

Dat ghy soeckt, soeck ik met.

 

Hans.

 

5. Laet Dochter desen Mellick-muyl,

 

En neemt een deftigh man.

 

Ienn.

 

Och! nam ick sulcken ouden uyl,

 

Ick waerder qualijck an:

 

Want ick sou by u levend’ lijf,

 

Behalven u gequet,

[p. 172]

 

V Maeght zijn, en u Weef u Wijf;

 

Dat ghy soeckt, soeck ick met.

 

6. Vaert wel dan ouden Rochelaer,

 

Ick sie naer mijns gelijck:

 

En weet ghy niet, o Lammert-Vaer,

 

Dat wie genoeght is rijck.

 

Hans.

 

Ey! staet doch stil, God segen’ ons,

 

Verhoort doch mijn gebedt.

 

Ienn.

 

Neen Hansken Vaer, ghy soeckt wat jonghs;

 

Dat ghy soeckt, soeck ick met.

Die een verrimpelt wijf op hoope trouwt van sterven,
Om soo naer hare doodt een jonger te verwerven,

Die sterft veel reysen eer, oft wordt wel haester oudt,

Al eer den armen sot een ander Vrijster trouwt.