Den boeck der gheestelijcke sanghen
(1631)–Lucas van Mechelen–
AuteursrechtvrijOp de VVijse: Lancks de kanten vander sinnen.
SVPERIOR.  | |
[pagina 163]
| |
BASSVS.  | |
[pagina 164]
| |
DAt ick mocht' van v begheeren
Eene gift', o ghever milt!
Grondelijck my te verteeren,
Als t'hert' dat van liefde smilt,
Is t'ghen' dat mijn siele wilt:
Schinckt my dit, o eeuwich goet!
Want dit wenscht nu mijn ghemoet,
Door al v ghenaden soet.
Als ick dinck wie ick moet wesen?
Om te blijven v ghetrouw',
En te zijn v uytghelesen,
Die in deughden ben soo flouw';
Mijn ondeught wel kennen wouw': Schinckt my dit etc.
Gheeft my, dat ick my mach kennen,
En door kenniss' worden kleyn,
En door kleynheydt my ghewennen
Tot een hert' pur ende reyn,
Daer ghy v me' maeckt ghemeyn: Schinckt my dit etc.
Wat kan ick anders verlanghen,
Oft begheeren opder eerdt,
Dan van v die deught t'ontfanghen,
Die alleen is wenschens weerdt;
Mijn ghebedt, o Heer! aenveerdt: Schinckt my dit etc.
Maeckt ootmoedich mijnen gronde,
Stelt my in dat neder-dal;
Leert my dat ick kleyn zijn konde,
Ghelijck zijn v Vrienden al,
Die v hier te voete val'. Schinckt my dit etc.
Overgheluck salich leven!
Van die daer versoncken staen
| |
[pagina 165]
| |
Voor v moghentheydt verheven,
Die v vrolijck schouwen aen,
En in v te niete gaen: Schinckt my dit etc.
Gheen ghenuchten desghelijcke,
Gheen vermaeck dat soo verheught;
T'is voorwaer een hemelrijcke,
T'is een oversoete vreught,
Te ghenieten dese deught: Schinckt my dit etc.
Gheeft my dese deught alleene,
Die ghy wilt dat in my zy;
Gheeft my des' en anders gheene,
Want ick my met dese ly';
Maeckt eens mijne siele bly': Schinckt my dit.
|
|