Het boeck der psalmen Davids

De Cxlj. Psalm.

Dauid t'onrechte besvvaert sijnde, begeirt van God getroost ende met ghedult ghesterckt te vvesen: Ende seker sijnde dat hy sulcx vercryghen sal: biddet dat God wrake doe ouer sijn vyanden.

1. TOt dy schrey ic o Godt almachtigh:
Kom my te hulp' end' haeste dy
In mynen noot verhoore my,
Als ick dy voordraeg mijn stem clachtigh.
2. * Laet mijn ghebeden opgheresen,
Sijn als een soeten wieroock brandt:
End' het opsteken myner handt,
Een heyligh auont offer wesen.
3. * Mijn tongh' end' mont wel naeuw beware:
Dat ick my nerghens en ontgae,
Een slot voor myne lippen slae,
Op datter niet quaets uyt en vaere.

[fol. Aaiiijv]

 

4. * Laet doch mijn hert' niet zijn gheneghen,

 

Tot saecken onrecht ende boos,

 

Met dese lieden goddeloos':

 

End' laet m'haer lusten gheenssins pleghen.

 

5. * Soo my de vrom' wilt slaen oft laken,

 

Ick acht dat hy my vrientschap doet:

 

Sijn straff' is als een balsem soet:

 

Dat gheen wond' in t'hooft en kan maken.

 

(1.) ** **

 

* Doch eer veel tijts noch sy gheleden,

 

Sal de god'loose zijn in druck:

 

Dat ick noch om zijn ongheluck

 

Sal voor hem storten mijn ghebeden.

 

6. * Als haere richters die t'roer stieren,

 

Ter neder sullen zijn gheslaen:

 

Dan salmen mijn woort hooren aen,

 

Want het is sacht end' goedertieren.

 

7. * Alsoo men steeuen hauw't in stucken,

 

Dat d'een hier springt end' d'ander daer,

 

Soo sietmen ons' ghebeent' te gaer,

 

Seer wreed'lijck van een ander rucken.

 

8. * Daeromme staet mijn oogh' verheuen

 

Tot dy Heer, ick heb dy vertrouwt:

 

Op dy alleen mijn herte bouwt,

 

Wil doch mijn siel niet heel bloot gheuen.

 

9. * Bewaer my Heer voor haere laghen.

 

Dies' op my hebben toeghelegt:

 

End' van den strick die my t'onrecht,

 

Van t'boose volck is voorgheslaghen.

 

10. * Maer laet de boos' in hare garen,

 

Dat sy my hadden toeghepast.

 

Ghevanghen worden end' verrast,

 

Dewyl' dat ick vry mach doorvaren.