Het boeck der psalmen Davids

De Lxvj. Psalm.

De Prophete vermaent de volckeren tot Godes loff, van vveghen syner vvercken ende syner regeringhe, soo van alle dingen int ghemeyne, als in sonderheyt van syner kercken. Ende ten laetsten sticht hy den lof Godes by sijn eyghen exempel.

1. Den Oppersangmeester een liedt ende Psalm gesanck.

2. JVycht God' het gantsch begrijp der eerden,
Singt synen naem lof, prijs end' eer,
Houdt synen roem in grooter weerden,
Maeckt hem vermaert so lancx zoo meer.
3. Spreeckt tot God: hoe zijn dyne daden
Soo schrick'lijck ende groot gheacht?
Dijn vyandt zijnd' in ancxt geraden,

[fol. Liiijv]

 

Sal hulden dyne stercke macht.

 

4. * Dy sal het volck van alle landen

 

Aenbidden o Heer met ootmoet.

 

Men sal met lied'kens allerhanden

 

Lofsinghen dynen naeme goet.

 

5. Comt aen, om vlytich te bemercken

 

Gods daden groot: want hy ghewis

 

Seer schrick'lijck in all' syne wercken

 

Ouer der menschen kind'ren is.

 

6. * Hy heeft de zee end' haere baren

 

Verkeert in droogt' als een dorr' sant

 

So datmen (dies wy blyde waren)

 

Daer ouer ginck als op het landt.

 

7. Sijn machtich heersschen niet en eyndet.

 

Sijn ooghen sien de heydens al

 

End' wie rebel sick van hem weyndet

 

Die' sal vercleynt comen ten val.

 

8. Ghy volcken prijst doch al te saeme

 

Ons' Heer end' God ghebenedijt:

 

Maeckt ouer al zijn lof end' naeme

 

Vermaert end' ruchtbaer breed end' wijt.

 

9. Hy is die ons behoudt in't leuen

 

Als onse sielen zijn benauwt:

 

Die onse voeten niet laet sneuen,

 

Al is ons t'herte wat verflaut.

 

10. * Want du hebst ons o God rechtveerdich

 

Versocht met cruys end' teghenspoet,

 

End' gh'lijckmen keurt het siluer weerdich

 

Hebstu ghekeurt ons' hert' end' moet.

 

11. Du hebst ons Heer ghebracht int garen

 

Dat voor ons voeten was ghestaeckt.

[fol. Lvr]

 

End' vanden streng' (die ons beswaren)

 

Ons om de lenden vast ghemaeckt.

 

(1) ** **

 

12. * Du hebst de menschen laten ryden

 

Op onse hooft als op een dier.

 

Wy hebben swaer cruys moeten lyden

 

End' gaen door water ende vier.

 

Doch du quaemst ons we'er daeruyt halen

 

End' gantz verquicken: 13. Dies ick sal

 

In dynen tempel dy betalen

 

Met offers mijn gheloften al.

 

14. * Gheloften die ick vry van herten

 

Met mynen lippen heb ghedaen,

 

End' in benautheyt ende smerten

 

Wt mynen monde laten gaen.

 

15. Ick wil dy doen mijn offerhanden

 

Van lammerkens vett ende goet,

 

End' soeten reuck van hamels branden

 

Met runders ende bocken bloet.

 

16. * Comt herwaerts, comt hoort mijn verhalen

 

Ghy die in Godes vreese leeft:

 

Ick sal v duydelijck vertalen

 

De deugt die hy my ghedaen heeft.

 

17. Ick riep tot hem met mynen monde

 

End' droeg hem voor al mynen noot:

 

Ick will' dat mijn tongh' hem verconde

 

End' synen naeme maecke groot.

 

18. * Voorwaer had ick voor my ghenomen

 

Te wandelen met arg end' list,

 

Mijn stemm' en waer tot hem niet comen,

 

Maer zijn ghehoor hadd' ick ghemist.

 

19. Maer nu (ghewis ick mach't vry reden)

 

De Heer' verhoort my alle tijdt,

 

Hy luystert scherp na mijn ghebeden,

 

End' hoorts' all' aen met ernst end' vlijdt.

[fol. Lvv]

 

20. * Dies moet de Heer God zijn ghepresen

 

Die mijn ghebet noyt en verstiet

 

End' heeft my noch noyt afghewesen

 

Van zijn ghenaed' in mijn verdriet.