Het boeck der psalmen Davids

[fol. Iviijv]

De Lvj. Psalm.

Dauid sijnde in der Philisteen handen ghecomen door het swaer vervolghen Saulis, bidt God om verlossinghe, stellende hem voor, syne vroomherticheyt, hy looft hem van vveghen syner ghedaene gheloften. Die hy bekent gherne te moghen sien.

1. Den Oppersangmeester vander (sielen) die ouerweldighet wort van een rot (der vyanden) die verde gheleghen zijn. Ende is een guldenliedt Dauids ghesonghen doe hem de Philisteen in Catthi, ghevanghen namen.

2. ONtferm dy mijns, want ick word' teenegaer
Verslonden Heer van der god'loosen schaer
Die my bestrijdt end' onderdruckt seer swaer

O God, ja gantsche daghen.

3. Mijn vyant wreedt heeft my ter ne'er gheslaghen:
Veel soecken my te sluyten in haer laghen
O hoogste God. 4. Als

[fol. Kir]

 

zy my doen vertzaghen

 

Mijn troost sal staen op dy.

 

5. * In God den Heer sal ick my roemen vry

 

Om zijns woordts wil: Op God vertroost' ic my

 

Dies vrees' ick niet, het zy oock wat het zy

 

Dat t'vleessche my doen konde.

 

6. Mijn eygen saeck maeckt my in't hert' een wonde

 

Met dag'lijcx rouw: want yeg'lijck soect een vonde

 

Om quaet te doen, end' my gantz uyt den gronde

 

Te brenghen in verdriet.

 

7. * Sy rotten sick, end' houden raet met vliet:

 

Want elck een loert, end' mynen gang' bespiet

 

End' poogt om my te brenghen heel te niet

 

Om mijn ellendich leuen.

 

8. Om dat sy zijn in schalckheyt wel bedreuen,

 

Maecken sick dietz dat hun geen schaey kan cleuen:

 

Maer Heer du salts' in toorne seer verheuen

 

Omstooten met ghewelt.

 

(1.) ** **

 

9. Du hebst mijn vlucht end' dolinghen ghetelt

 

Mijn tranen oock in eener cruyck' ghestelt

 

Mijn suchting' staen all' ordentlijck vermelt

 

In dijn registerboecken.

 

10. Als ick den Heer met mijn ghebet sal soecken,

 

Mijn vyandt sal ter vlucht hem stracx vercloecken:

 

Want ick wel weet dat hyse sal vervloecken

 

Want hy't doch met my houdt.

 

11. * Op God den Heer staet mijn roem vast gebout,

 

Om zijns woorts wil: daer mijn hert' op vertrout:

 

Want in zijn woort warachtich sonder fout

 

Sal ick Gods loff ghewaghen.

 

12. Mijn hop' end' gront is op den Heer gheslagen

[fol. Kiv]

 

Gheen menschen doen, en sal my doen vertzagen,

 

13. Dies mijn gheloft' heb ick dy voorgedraghen

 

Na dat ick ben verplicht.

 

* Daerom sal oock in allemans ghesicht

 

Dijn loff door my seer heerlijck staen ghesticht:

 

14. Want du mijn siel hebst weder opghericht

 

End' vryghemaeckt van steruen.

 

Du hebst bewaert van sneuen menichweruen

 

Mijn voeten swack: dies ick vry van't verderuen

 

Wandel voor God, met den ghen' die beeruen

 

Des leuens heylsaem licht.