Het boeck der psalmen Davids

De Lvij. Psalm.

Dauid vluchtende voor Saul, bidt om ghenade ende verlossinghe aen God, verhaelt sijn ghelooue ende der god'loosen archeyt: begerende dat Gods gerichten, moghen haren voortganck hebben.

1. Den Oppersangmeester. Een guldenliet Dauids, en verderfue niet tot dat Dauid uyt vreese van Saul in een diepen kuyl hem verbergden.

2. ONtferm dy God ontferm dy ouer my,
Want myne siel vertrout alleen op dy:
Dies sal ick my met dyne vleughels decken
So lang tot dat die boosheyt gae voorby,
End' de god'loos' als

[fol. Kijr]

 

een wolck snel vertrecken.

 

3. * Tot d'hoochsten God climt mijn stemm' met gheschal

 

God die ghewis zijn werck volvueren sal,

 

4. Hy sal my hulp' van uyt den hemel senden

 

End' in den ban doen mijn verslinders all,

 

End' zijn ghenaed' end' waerheyt tot my wenden.

 

5. Mijn siele woont als onder leewen wreet

 

End' onder t'volck dat glimt als een vier heet.

 

Als spiessen scherp, end' pylen zijn haer tanden.

 

Haer tonghe snijdt met valsheyt end' meyneede

 

Als een scherp sweert in s'wreeden moorders handen.

 

(1.) ** **

 

6. * Verheff dy God bouen den hemel claer

 

Dijn heerlijckheyt maeck op d'eerd' openbaer:

 

7. Sy hebben t'net mijn voeten voorghehanghen.

 

Mijn arme siel is verkromt teenegaer.

 

Sy poogden vast om m'in een kuyl te vanghen.

 

* Maer sy zijn self daerinne ne'erghevelt

 

8. Dies is mijn hert' nu rechte wel ghestelt:

 

Mijn hert' o God is reedt voor alle dinghen,

 

Dat dyne loff van my recht werdd' vertelt,

 

Ick wil dijn prijs met blyder herten singhen.

 

9. * Nu stae dan op, mijn eer: mijn tong' ontwaeck:

 

Mijn harp end' luyt met vreugden haer vermaeck,

 

Want ick wel vroeg wil dy o Heere prysen,

 

10. End' onder t'volc van dijn deugt doen uytspraeck

 

End' van dijn lof de Heydens onderwysen.

 

11. * Want dijn ghenaey den hemel ouerreckt

 

End' dyne trouw' verrr' ouer wolcken streckt.

[fol. Kijv]

 

12. Verhef dy Heer bouen des hemels throonen,

 

Dijn loff end' eer die du ons hebst ontdeckt

 

Wil wijt end' breedt op all' het aertrijck thoonen.