Het boeck der psalmen Davids

Der xlvij. Psalm.

De Iootsche ghemeynte verwect de Heydenen om God te kennen ende Christum te ontfangen ende te vercondighen, Soo wel van weghen haerder ghemeyne beroepinghe, als van wegen der allersterckste macht ende heerlijcke verbreydinghe des Coninckrijcks Christi.

1. Den Oppersangmeester onder de kinderen Korachs, een Psalmliedt.

2. UOlcken allerhandt,
klappert inde handt
Sijt in Godt verheugt,
Bedrijft groote vreugt,
Met stemm' end' ghesang,
Ende snaergeclanck.

[fol. Hvjr]

 

3. Want Godt is de Heer,

 

Allerhoogst' in eer,

 

Vreeselijck van cracht,

 

Coninck sterck vast macht,

 

End' op d'eerdrijcx schoot,

 

machtich ende groot.

 

4. * Onder ons ghewelt,

 

Heeft zijn handt ghestelt

 

Volcken groot end' swaer:

 

Heydens t'eenegaer,

 

Stelt hy met ootmoet,

 

Onder onsen voet.

 

5. Hy gheeft ons t'ghenot,

 

Van ons' erff' end' lott,

 

Jacobs hoogsten roem:

 

Ende schoonste bloem,

 

Die hy als een schatt,

 

Seer lief heeft ghehadt.

 

6. Siet Godt comen hier,

 

Met een groot ghetier,

 

Van vreugt end' ghebaer

 

Der basuynen claer:

 

7. Sing't den Heere, sing't,

 

Onsen Coninck schinckt

 

Vrolijck, prijs end' danck

 

Ende Psalm ghesanck.

 

8. Want Godt voor ghewis

 

S'werelts Coninck is,

[fol. Hvjv]

 

Dies looft hem end' prijst,

 

End' and'r onderwijst.

 

9. Want Godt heersching' heeft,

 

Op t'volck datter leeft,

 

Sittend' op zijn throon,

 

Heylich ende schoon.

 

10. Vorsten op der eird'

 

Hebben haer vergeirt,

 

Voor Godts lief aenschijn,

 

Om van t'volck te zijn

 

Godes die den stamm'

 

Koos van Abraham.

 

* Want Godt soo hy wilt

 

Voert des aertrijcks schilt

 

D'welck hy heeft ind' oogh':

 

Hy is machtich hoogh'

 

Ouer t'aertsche dal,

 

Ja oock bouen all.