Het boeck der psalmen Davids

De xxvj. Psalm.

Dauid sijnde van synen vyanden vervolght, neemt synen toevlucht tot Godt den Richter: bewijst syne oprechticheyt ende ontschult: derhaluen hy bidt om te moghen verlost werden van syne verdruckinge, ende genade ontfanghen om des Heeren naem te louen.

1. Dauids Liedt.

RIcht my, Heer, na mijn recht:
Want ick mijn

[fol. Dvijr]

 

wegen slecht

 

Bewandel met een vroom gemoet

 

Op Godt staet mijn vertrouwen,

 

Hy sal my so vast houwen

 

Dat my niet struyck'len sal de voet.

 

2. * O Heer versoecke my

 

End' ondertaste vry

 

Off ick met valsheyt ommegae

 

Bekoor mijn hert' end' nieren

 

In allerley manieren,

 

End' goed' acht op mijn wandel slae.

 

3. * Want dijn gunst end' weldaet

 

My eewelijcken staet

 

Voor d'ooghen claer end' int ghesicht.

 

Ick hebbe mynen handel,

 

End' allen mynen wandel

 

Nae dyne waerheyt steed's ghericht.

 

4. * Ick hebbe noyt gheleeft

 

Met t'volck dat hem begheeft

 

Tot loghentael end' valschen schijn.

 

Ick wil met dien niet treden

 

Die onder hare leden

 

Bedeckt end' dobbelhertich zijn.

 

5. * Ick schroom' end' hebb' een haet

 

Van al t'gheselschap quaet

 

Dat sick tot boosheyt heeft ghewendt:

 

Dies will' ick niet verkeeren

 

Met lie'en die Godt niet eeren

[fol. Dvijv]

 

End' dien zijn naem is onbekent.

 

(1). ** **

 

6. * Ick wasch' myn' handen reyn

 

So ick't van herten meyn'

 

In onschult suyuer ende claer,

 

Dies sal ick comen treden

 

Met offers end' ghebeden

 

Voor dynen heylighsten autaer.

 

7. * Op dat mijn hert' end' mont

 

Dijn lofsang make kondt

 

Met heller stemmen end' gheklanck,

 

End' dyne wonderwercken

 

Die sick vry laten mercken

 

Vertelle dy tot lof end' danck.

 

8. * Ick muur met herten kuys

 

De stede van dijn huys

 

Daer sick dijn goetheyt openbaert:

 

Ick houd' in grooter weerden

 

Die woonstadt hier op eerden

 

Daer sick dijn heerlijckheyt verclaert.

 

9. * Laet mijn siel inden loop

 

Met der sondaren hoop

 

O Heer niet werden opgheraept.

 

Noch mijn onschuldig leuen,

 

Met't volck die haer begheuen

 

Tot bloet vergieten, zijn betraept.

 

10. * Want in haer wreede handt

 

Steeckt boosheydt allerhandt

 

Die hun de gheest altijts bedenckt.

 

De vuyst wert hun bestreken

 

End' d'ooghen gants besteken

 

Met giften diemen steed's hun schenckt.

 

11. * Maer ick sal my altoos

 

Afkeeren van het boos'

 

End' steed's met vroomheyt ommegaen

[fol. Dviijr]

 

O Heer, mits dijn ghenaden

 

Verlost my vanden quaden.

 

Ontferm dy mijns: end' neemt my aen.

 

12. * Die wyl' mijn voeten staen

 

Nu op de rechte baen

 

Wel vast end' vry van allen noot.

 

So wil ick God den Heere

 

Oock gheuen prijs end' eere

 

Voor menichten van volcken groot.