Het boeck der psalmen Davids

De seuenste Psalm.

Dauid sijnde t'onrechte besculdicht, begeert verlossinge van Godt: ghetuygende sijn gelooue, ende de oprechticheyt zijns gewissens: Hy bidt dat het quaet, dwelck hem bereyt werde, sy van hem ghekeert: ten eynde, sijnde gesterckt in den gelooue, hy voorsegt het aenstaende verderf der goodloosen, ende dat Godt vanden Godsalighen gheroemt sal worden.

1. Een liedt Dauids gemengt met verscheyden toonen, welcke hy den Heere ghesonghen heeft, op de woorden van Chusch de Ben-Jamiter.

2. ALmachtich Heer mijn Godt ghenadich

[fol. Avijv]

 

Op dy alleen hop' ic ghestadich,

 

Dies help my Heer met stercker cracht

 

Wt aller mijn vervolghers macht.

 

3. Dat haren hoop mijn arme siele

 

Niet wech en rooue noch verniele,

 

Ghelijck een Leeu diet all' verteert,

 

Daer niemant sijn ghewelt en weert.

 

4. * O Heer mijn Godt word' ick bevonden

 

Op sulcker daedt als sy oorconden

 

Oft heb ick oyt ontrouw' begaen

 

Also sy valsch'lijck gheuen aen.

 

5. Heb ick daer toe met quaet vergouden

 

Die my weldeden end' betrouden,

 

Ja heb ick niet altijdt ghereedt

 

Gheholpen mynen vyandt wreedt:

 

6. * So laet hem vry, ick ben's te vreden

 

Mijn siel vervolghen end' vertreden,

[fol. Aviijr]

 

Mijn leuen onder d'eerd' hy keer'

 

End' tot stof maeck' mijn naem end' eer:

 

7. Stae op dan toornich end' verbolghen,

 

Op des' die t'onrecht my vervolghen

 

Ontwaeck end' ledt op myne saeck,

 

Op dat ick tot mijn recht gheraeck.

 

8. * Laet Heer het volck met groote scharen

 

Om dynen richterstoel vergaren,

 

End' dat dijn majesteyt aldaer

 

Hooch' sy verheuen ouer haer.

 

9. Godt sal der volcken richter wesen,

 

Alsdan mijn Heer mijn Godt ghepresen

 

Richt myne zaeck, laet my mijn recht

 

Ghenieten nae mijn vroom'heyt slecht.

 

(1) Pause

 

10. * Der schalcker boosheyt breng' ten ende,

 

End' ouer vromen dijn gunst wende

 

Du Godt rechtveerdich die du vroet

 

Doorgrondest elcx hert' end' ghemoet.

 

11. Godt is mijn troost daer ick op bouwe.

 

Hy is mijn schilt dien ick betrouwe:

 

Want hy bewaert end' helpt ghewis

 

Elck een die vroom van herten is.

 

12. * Godt die een rechter is rechtveerdich,

 

End' straft al die zijn straffens weerdich,

 

Een God wiens toorne dach voor dach

 

Den menschen dadich blijcken mach.

 

13. Hy heeft het sweert reed' uytghetoghen

 

End' vast ghespannen syne boghen

 

Op dien die my maeckt dit gheschil,

 

So verr' hy niet bekeeren wil.

 

14. * Godt heeft geweer ter hant gegrepen

 

Het dood'lijck mes is al gheslepen

 

Moordadigh' pylen staen ghereedt

 

Op mijn vervolghers fel end' wreedt.

[fol. Aviijv]

 

15. End' noch soect dese voorts te brenghen

 

Sijn archeyt die doch sal mislenghen,

 

Verloren moeyt' heeft hy ontfaen

 

Dies sal hy baren valschen waen.

 

16. * Hy arbeydt ende pijnt hemseluen

 

Om eenen diepen kuyl te deluen,

 

Met boos' opset end' quaden sin:

 

Maer hy sal vallen selff daer in.

 

17. Hy wilt my ongheluck bescheiren:

 

Maer t'sal hem self' ten hoofd' uytsweiren,

 

Op synen kop valt al het quaet

 

Daer hy so listelijck nae staet.

 

18. * Dies wil ick prysen Godt den Heere

 

Sijn g'rechticheyt tot lof end' eere:

 

Ick wil met Psalmen seer bequaem

 

Hooch louen s'allerhoochsten naem.