Het boeck der psalmen Davids

Den vj. Psalm.

Dauid cranck sijnde bidt den toorne ende de straffe Gods af, aenroept syne barmherticheyt, ende begheert heylinge. Tvvelck hy stracx daernae met een ongetvvijffelt gelooue gevoelende, sick tegen syne vyanden van wegen der genaden Gods beroemt.

1. Den oppersangmeester van het snarenspel op de achste snare. Een Psalm Dauids.

2. HEer straff niet mijn misdaden
In toorn' end' ongenaden:
Maer heb met my gedult,
Wilt ouer my niet wreken
Met gramschap sijnd' ontsteken

Mijn sond' end' sware schult.

[fol. Avjv]

 

3. * Ontferm dy Heer barmhertich

 

Mijns drucks end' lydens smertich:

 

Want tis met my ghedaen.

 

Wil my ghesontheyt gheuen:

 

Want mijn ghebeenten beuen,

 

End' zijn met schrick bevaen.

 

4. * Mijn siel is my benouwet

 

Mijn hert' is schier verflouwet

 

Van ancxt tot inden doot:

 

My is vervaerlijck banghe,

 

Maer du o Heer hoe langhe

 

Verlaetstu my in noot?

 

5. * Wil dy tot mijnwaerts wenden

 

End' mijn siel vol ellenden

 

Verlossen uyt dees' pijn

 

Behoud my, slae my gade

 

End' wil om dijn ghenade

 

Mijn salichmaker syn.

 

6. * Dewijl' van dy gheen melding

 

In s'doodes ouerwelding

 

Doch nymmermeer gheschiet,

 

Wien soud' m'oock connen noemen

 

Die dynen lof mocht roemen

 

Sijnd' onder s'doots ghebiet?

 

7. * Mijn treuren doet my smachten,

 

Dies my t'bedd' alle nachten

 

Swemt in een tranen badt.

 

Met weenen onbesweken

 

Doe ick mijn koetse leken

 

End' maeckse gheheel nat.

 

8. * D'oog is my van te treuren

 

End' schreyen t'elcke euren

 

By nae gantz wtgheteert,

 

End' van steed's te sterrooghen

 

Op mijns verdruckers pooghen

[fol. Avijr]

 

Is heel moed' opghespeert.

 

9. * Laet van my stracx vertrecken,

 

Al die haer handt uytstrecken

 

Om boosheyt te begaen:

 

Dewyle Godt almachtich

 

Mijns weenens stemme clachtich

 

Beghint te hooren aen.

 

10. * De Heer verhoort mijn claghen,

 

End' laet hem wel behaghen

 

Mijn hertelijck ghebet.

 

Mijn smeecken seer ootmoedich

 

Ontfangt de Heere goedich

 

End' ernstich daer op lett.

 

11. * Dies sullen die my haten

 

Beschaemt zijn uyter maten

 

End' staen in grooten schrick

 

Sy sullen wederkeeren

 

Met schand' end' met oneeren

 

Stracx op een ooghenblick.