Het boeck der psalmen Davids

[fol. Avr]

De vijfde Psalm.

Dauid aenroepende den Heere, bekent dat hy overmits sijn goet gewissen ende de ongerechticheyt syner wederpartyen, Gods goetdadicheyt met eerbiedinge is verhopende, ende sijnde alsoo gesint begeert dat God hem regere, ende syne wederspannige vyanden nedervelle, ende dat syner gemeynte stoff gegeuen werde tot Gods lofsang.

1. Den Oppersangmeester op het fluyten spel. Eenen Psalm Dauids.

2. ACh Heer wil gunstich myne reden
Dy stracx ter ooren laten gaen:
End' wil genadelijck verstaen,
Waeromm' mijn geest vol van onvreden

Hardt wort bestreden.

3. * O du mijn Godt end' Coninck machtich
Wil doch mijn stemme nemen waer
Die voor dy schreyt hell ende claer:
Want dy alleen doen ick aendachtich

Mijn ghebet clachtich.

4. * Wilt dan o Heer mijn stemm' end' clachten
Vroech hooren voor den dagheraet:
Want s'morghens eer de sonn' opstaet,
Sal ick van herten dy naetrachten

End' op dy wachten.

[fol. Avv]

 

5. * Du bist een Godt die aen quaey zeden

 

End' god'loosheyt gheen lust en heeft.

 

End' wie tot boosheyt hem begheeft,

 

Sal nimmermeer in dijn woonsteden

 

Werden gheleden.

 

6. * Insghelijcks en sullen voor dijn ooghen

 

Gheen dwase snorcken kunnen staen,

 

Du salt met onghenad' afslaen

 

Al die nae boose wercken pooghen.

 

End' niet en dooghen.

 

(1) ** **

 

7. * Du salt verderuen all' die wijcken

 

Tot valssche leughens end' meyneedt:

 

Godt heeft die bloetvergieters leedt,

 

End' haetet all' die met practijcken

 

Haer naest' uytstrijcken.

 

8. * Maer ick mids dyn' ghenadigh' ooghen

 

Wil in dijn huys vrymoedich gaen:

 

End' metter vreese Godts bevaen

 

Sal nae dijn heyl'ghen Tempel pooghen

 

My ne'er te booghen.

 

9. * Wil my dan seker Heer gheleyden

 

Dat ick dyn' gh'rechticheyt gheniet'

 

Om s'volcx will' dat my naew verspiet,

 

End' wil my sonder meer te beyden

 

Dijn baen bereyden.

 

10. * Want daer en is in haren monden

 

Gants niet oprechts: t'hert is hun vals,

 

Een open graf is haren hals

 

End' hare tong' is t'allen stonden

 

Vol smeeckens vonden.

 

11. * Heer wils' in sonden nedervellen,

 

Laet hun mislinghen haren raet,

 

Verstootse wijt om haer misdaet.

 

Tis teghen dy dats' als rebellen

 

Haer trotzich stellen.

[fol. Avjr]

 

12. * Maer laet een eew'ghe vreucht ghewinnen

 

Een yegh'lijck die op dy vertrout

 

Bescherms' Heer' Godt end' onderhoudt

 

In blyschap, die van hert' end' sinnen

 

Godts naem beminnen.

 

13. * Want den gherechten salstu toonen

 

Heer dynen seghen rijck end' mildt,

 

End' salt hem als met eenen schilt

 

Met liefd' end' gunst seer cierlijck croonen,

 

End' hooch beloonen.