Het boeck der psalmen Davids

[fol. Aiiijr]

De vierde Psalm.

Dauid biddende, straft syne vyanden van onvromicheyt ende ydelheyt, ende vermaentse tot bekeeringhe ende recht ghelooue: ten laetsten bidt Godt dat hy hem met sijn gheest ende vvoort richten vvill.

1. Den oppersangmeester op het snarenspel, Een Psalm Dauids.

2. ALs ick roep' antwoord' op mijn schreyen
O Heer Godt myner g'rechticheyt
Die du my pleegst steed's sonder beyen
Wt allen ancxt op't ruym te leyen:
Ontferm dy mijns, hoor mijn bescheyt.
3. Ghy mans hoe lang' sult ghy bedragen,
Mijn goede naem end' eer met smaet?
Hoe lang' sult ghy te vergeefs iagen,
Nae ydel end' onnut' aen-

[fol. Aiiijv]

 

slaghen,

 

End' staen na leughen end' verraet?

 

4. * Weet dat de Heere Godt ghepresen

 

Hem selfs een aenghenamen mensch

 

Verkoren heeft end' uytghelesen.

 

Ick sal van hem verhooret wesen

 

Als ick hem voorstell' mynen wensch.

 

5. Vreest dan end' reyert van dies weghen

 

Vergrijpt v niet teghen Godts will':

 

Maer zijnde snachts te bedd' gheleghen,

 

Wilt dit wel neerstich ouerweghen

 

In v ghemoet end' swyghen still'.

 

6. * End' comt daer naer den Heer voorhouwen

 

U offerhanden end' ghebett,

 

Recht ongheveyst met goeder trouwen,

 

End' wilt dan vry op den Heer bouwen,

 

U hope sy op hem ghesett.

 

7. Het segghen veel, wie sal ons tooghen

 

Dat eenich end' rechtsinnich goet

 

Maer du, o Heer, wil slechts ghedooghen

 

Dat t'klare licht van dynen ooghen

 

Beschyn' end' verlicht' ons' ghemoet.

 

8. * Dijn aenghesicht heeft my veel meere

 

Met vreuchden in het hert beroert,

 

Dan sy en voelen o Godt Heere,

 

Wanneer hun ouervloedich seere

 

Wijn ende graen wert toeghevoert.

 

9. Daeromme wil ick gaen met vreden

 

My legghen ne'er end' slapen vast:

 

Want du alleen my stoff' end' reden

 

Bereyd'st dat ick mach seker treden,

 

End' vry gaen sonder sorg' oft last.