Versamelde werke

Kostuums

tuinfee. Spierwit, lang, loshangende rok, soos Griekse kostuum. Wit lelie in die hand, en loshangende hare.

tuinman. Donker hemp, lang broek, rooi doek om nek. Kom ingestap met tuingereedskap.

roos. Roosblare word gemaak van pienk rimpelpapier, vasgeplak op iets styfs.

lelie. Om leliekelk voor te stel, word kostuum van wit sierpapier gemaak.

angelier. Die hooftooi moet 'n angelier voorstel, en die rokkie word van sierpapier gemaak, in kleure wat daarby pas.

sonneblom. Die hoed moet tipies 'n sonneblom voorstel.

afrikanertjie. Oranje sierpapier word gebruik, en die hooftooi stel 'n Boerekappie voor.

viooltjie. Pers of blou, met 'n hoed wat 'n oop viooltjie voorstel.

vlindertjies. Rokkies gemaak van satinet (aparte kleure blou en geel), vlerke van dun gaas en oë daarop geverf.

[p. 1048]

lieweheersbesie. Alles geel, met ronde swart kolle. Los japon en gladde mussie. Swart kouse en pantoffels.

spinnekop. Kostuum van fyn net en spinnerak deurwerk met klein blink kraaltjies.

bye. Swart fluweel met geel strepe. Aan die koppie word voelers van draad bevestig.

mot. Die motvlerke word van fyn vaal gaas gemaak, deurgewerk met swart wol.

voëltjie. Kostuum van swart satinet gemaak met wit borsie.

By elkeen van die hooffiguur-blomme is 'n klein blommetjie van dieselfde soort, maar aparte kleur. Daar is 26 verskillende blommetjies: twee vygies, twee viooltjies, twee affodille, drie pronk-ertjies, een vergeet-my-nietjie, drie madeliefies, twee Jakobregops, twee asters, twee koringblomme, twee papawers.
Die manteltjies word gemaak van goedkoop bruin stof. Los oop manteltjie, met 'n vierkantige stukkie aan die hals vasgewerk, om sommer los oor die hoof te hang.