Versamelde werke

Mahlo-a-Naledi
(Marie, vyf jaar oud, aan die noordelike vorm van Laryngismus Crouposus gestorwe, na 'n vreeslike lyding van agt dae en agt nagte.)

Vaarwel, Marie, slaap diep en stil!
Jou blomgesiggie, nou so wit en kil,
lyk ernstig, met die glimlag uitgewis,
asof die ewigheid 'n grote wonder is.

Ag liefling, hoe sal ons jou almal mis -
jou vrolik' laggie en jou bly gesels,
die ronde armpies klaar om te omhels,
die bly ontmoeting in die voetpad saans ...

Die hele huis is skielik stil geword;
die worst'ling is verby, en jou gelaat,
omring met bruine lokke soos 'n straalkrans uitgestort,
toon diepste vrede; met gevoude handjies en in wit gewaad -

[p. 1045]

 

nooit, met gewyde visioen bedien,

 

het kunstenaar vanouds die Heil'ge Kind só skoon gesien!

 

 

 

Jy weet dit nou miskien hoe dom ons was,

 

ons kuns hoe nutteloos, ons sagste werk hoe ru en kras,

 

toe ons moes kalm wees, deur ons liefde hoe geroer, -

 

ons wat die stryd om jou lief lewe deur moes voer -

 

terwyl daarbuite as 'n vreeslik' weemoedskoor

 

moes ons gedurig nog die snikkende gebede van jou moeder hoor

 

tot Hom wat alle kleintjies lief had, en hul reg,

 

g'n enkel een 'n druppel water sou ontseg, -

 

en dag na dag, en nag na vreeslik' nag,

 

was al haar smeke onverhoor, haar trane ongeag.

 

 

 

Vaarwel Marie!

 

Ek weet dit nie

 

tot wie se groot genoeë dit kon strek

 

jou reine onskuld op die vreeslik' pynbank uit te rek;

 

miskien, ag, as jou liewe lippies nou kon praat,

 

jou soete stem weer hoorbaar word, was jy in staat

 

die groot geheim te openbaar

 

waaroor ons nou verbyster staar.

 

Ag liefling, álmal sal jou bitter mis.

 

Vaarwel Marie! Ek weet dit nie!

 

Een ding weet ek gewis: voortaan

 

sal niemand jou meer pynig nie.
^*

* Sterre-oë (haar naturelle-naam.)