Versamelde werke

[p. 1031]

Sonder Betaling

Dis kleine dingetjies wat meeste vreugde bring:

van kindertjies wat speel, die bly gelag;

'n lewerik wat in wolke sing;

die sag' gedruis van druppels in die nag.

Swart doringbome teen die westegloed;

die groen van wuiwend' gras wat hoog

die bult omsoom;

lang lelies in die gras, nes druppels bloed;

die dof' gemurmel van 'n waterstroom.

'n Sware werk goed afgedaan;

'n wandeling met 'n vriend wat ons bemin;

die eerste groen langs muur en laan;

die gloed vanuit 'n liefdevolle huisgesin;

die blydskap, uitgestort en vry,

loop ons op eensaam' weë raak.

Dit kos alleen die soek om te verkry:

die dinge wat die Lewe 'n vreugde maak.