klim. Die poging werd onder 'n hewige vuur voortgesit, nadat die afdeling te perd die kloof op gejaag het tot by die eerste kranslyste. Hier moes hulle afspring en die krans uitklim. Dit was waarskynlik die bitterste moment van sy lewe toe kapt. Boshoff (toe nog maar 'n seun) van sy perd moes afskeid neem. Dit het so lank geduur dat sy oom - die genoemde ou heer Van der Merwe - 'n afstand teruggekom het om hom te dwing om die ander te volg. Kapt. Boshoff het die tweede lys reeds bereik, toe hy 'n verbasende feit gewaar. Hy hoor 'n harde gerunnik wat hy dadelik herken as die stem van die Arabier; dit was sy perd wat trag om hom langs die eerste lys te volg. Dit kon hy nie verduur nie en sonder om sy voorneme bekend te maak, spring hy om en binne 'n paar sekondes was hy in die saal. Die hele kloof was beset met Engelse, en 'n groot afdeling ‘National Scouts’. Dit was deur hierdie laastes wat kapt. Boshoff moes jaag. Sy ouer broer het hom 'n sekere afstand te voet gevolg in 'n poging om hom van sy hopelose onderneming terug te roep. Dit het sy eerste redding van 'n gewisse dood ten gevolge gehad. Net toe hy op die punt van die eerste krans uitkom, staan 'n ‘National Scout’ met 'n lang, swart baard hom in te wag op 'n afstand van vyf of ses tree. Kapt. Boshoff had sy geweer aan die ander kant van die perd en het hierdie gevaar eers besef toe dit te laat was om sy geweer om te swaai, maar net toe die ‘Scout’ aanlê om hom deur die skouerknoppe te skiet, kom die heer Karl Boshoff in gesig. Dit het hom geluk om die ‘Scout’ deur die kop te skiet 'n oomblik voordat hy sy eie skoot sou afgetrek het.
Kapt. Boshoff beweer dat hy nooit die afgryslike gesig sal vergeet nie toe die groot, forsgeboude man stadig vooroor sak, sy gesig en baard reeds rooi van die bloed, om honderde voete in die diepte af te stort.
'n Paar sekondes later was kapt. Boshoff tussen die Engelse en van alle kante word op hom gevuur en op afstande van 'n paar tree. Die Arabier was so rats soos 'n klipbok, en nooit het hy sy ratsheid van groter node gehad nie. Hoedat hulle deurgekom het, kan geen mens tot vandag toe verklaar nie. Alles het gebeur binne gesig van sy makkers op die krans wat hom gehelp het deur 'n aanhoudende vuur op die naaste Engelse te rig. Kapt. Boshoff het hom plat op die perd se nek gedruk en met een hand geskiet solank sy magasyn patrone had. Die teuels het hy los gelaat en die Arabier toegelaat sy eie pad deur die vyand te kies. Sy linkerhand het hy elke nou en dan in die lug gewaai om sy ewewig te behou. En hy is deur! Hy had 'n onmoontlikheid uitgevoer met behulp van sy dappere klein hings.
Dit was toe hy die Kapenaars bereik dat hy die eerste keer geleentheid had om die skade wat hy gely het, op te neem. In die eerste plaas was sy hoed absent! Hy het gevoel toe dit van sy kop geskiet word. Oor die linkerhand was 'n lang bloedstreep deur 'n koeël geploeg toe hy dit in die lug gewaai het om sy balans op die perd te bewaar. Een of twee skote deur die klere, twee deur die saalklappe en twee bloedstrepe langs die blad van die Arabier.
Auteursrechtelijk beschermd