Van Athenion, Schilder van Maronaea.
Desen Athenion is in vroeghe Iaren rijp gheweest in de Const, hy wort toeghenaemt Maronijt, des ick acht, hy zy gheweest uyt Thracien, van Maronaea, een Stadt aldaer, die nu ter tijdt is ghenoemt Marogna. Hy leerde t'schilderen onder eenen Glaucion van Corinthen, van welcken ick niet bysonders en vinde. maer Athenion wordt wel soo goet gheacht als Nicias, en oock meenige deelen beter: Doch hy hadde dat gebreck, dat hy zijn verwen te seer versmoorde, en wroch: veel harder als zijn Meester: nochtans was zijn werck seer vrolijck, en sulcx, datmen in hem con oordeelen te wesen een diepsinnich verstandt. Hy conterfeytte den Tyran Philarchum, die gestelt was in den Tempel van Ceres Eleusina. Hy maeckte oock t'Athenen eenen heelen deel Ionckvrouwen, die tot Cereris Offerhande ginghen, met korfkens op hen hoofden vol bloemen, die om t'korfdraghen werden Polygynaecon gheheeten. Hy heeft oock ghemaeckt eenen jongen Achilles, in Vrouw cleederen wesende onder de Ionckvrouwen van den Coningh Nycomedes, daer zijn Moeder Thetys hem hadde verborgen, op dat hy voor Troyen, nae de voorsegginge, niet van Paris gheschoten soude werden: Hier hadde hy gheschildert oock, hoe den schalcken Vlysses hem quam vinden en openbaer maken met een deel geweer en harnas: dit was een seer uytnemende stuck. maer boven alle de stucken die hy maecte, werdt ghepresen een, daer in hy hadde ghemaeckt eenen Stalknecht, die een Peerdt bestelde. Hadde desen constigen jonghen Meester mogen leven, daer en hadde geen Schilder van den ouden tijdt by hem mogen zijn gheleken: Dan Atropos heeft hem nijdich den Pinceel uyt de handt ghenomen, en zijn jongh levens draedt vroegh afghesneden: Doch Fama heeft den naem Hebe oft d'onsterflijckheyt te bewaren gegheven.
Auteursrechtelijk beschermd