Van Callimachus Schilder, en Beeldt-snijder.
Was den verhaelden Apollodorus wonderlijck en seldtsaem van sinnen, en nauw soeckich in de Const. Desen Callimachus, ik meen van Athenen, en is niet minder gheweest. Hy is seer vermaert gheworden door eenen spotlijcken bynaem, die hem worde byghevoeght, te weten, Cacizotechnos, dat is, Const-verachter, om dies wille dat hy altijts zijn eygen werck verachtede. Hy en con hem nemmermeer versaden van de Const verder en verder te soecken, t'welck al te veel dickwils maeckt, datmen den goeden wegh mist, en comt in een verbijstertheyt, dat ons tot Exempel wel dient, om niet al te heel sorghvuldich te wesen, dat wy niet en souden ten lesten connen in onse Const voort varen, oft dat wy niet en comen te bederven t'ghene wy eens wel ghemaeckt hebben, ghelijck desen dede. Hy hadde ghemaeckt eenen dans van Vroukens, ghecleedt op de maniere van Lacedemonien: Dit werck wilde hy naederhant verbeteren, maer hy benam hem al zijn gratie. Hy hadde ghemaect eenen Lantern van Coper gegoten, daer t'licht een Iaer langh in conde branden, sonder dat de Oly verginck: desen stelde hy t'Athenen in't Slot van Minerva. Hy was d'eerste, die de steenen vondt te doorbooren.
Auteursrechtelijk beschermd