De gulden harpe, inhoudende al de liedekens, die voor desen by K.V.M. gemaeckt, ende in verscheyden Boecxkens uyt-ghegaen zijn

Nieu Liedt,

na de wijse: Wie hoor ick suchten, van waer komt dit gheklanck. Oft, van soet Robertgen.

D'Euangeliste, Lucas doet ons vermaen,⁺
Op dat elck wiste, zijn gedachten t'ontslaen,
Te staen, op Aerdtsche dinghen // meest,
Daer 's Menschen sonderlinghen // gheest
Is toegheneghen saen,
En moet doch al vergaen.

Den Heer der Heeren, zijns Vaders wille goet

+ Luce 12.13

[p. 156]

 

Quam vlijtich leeren vant Hemelrijcke soet

 

Hier ons arme sondaren // zwack,

 

Meester, een uyt de scharen // sprack,

 

Seght mijn Broeder, dat hy

 

D'erve deyle met my.

 

Maer Christus seyde: Wie heeft rechter ghestelt

 

My, dat ick scheyde, onder u erf oft veldt,

 

En noch hy goedertierigh seyt,

 

Siet toe, wacht u voor gierichheyt,

 

Niemant van't goedt en leeft,

 

Dat hy seer veel hier heeft.

 

Noch met ghewisse, Redenen seyd' hy een

 

Ghelijckenisse, Tot desen int ghemeen,

 

Hoe datter was een rijcke // Man,

 

Die overvloedelijcke // van

 

Een zijn schoon ackerlandt

 

Ghekreegh vruchten ter handt.

 

Vreughdigh ontwaken // hy in hem zelven dacht,

 

Wat sal ic maken? waer sal ic al dees macht

 

Van vruchten moghen berghen // in?

 

Hy sprack in zijnen erghen // sin,

 

Oft in zijn herte coen,

 

Dit sal ick nu gaen doen.

 

Ick sal afbreken, mijn schueren nu ter tijt,

 

En ongheleken, al meerder maken wijt,

 

Daer in sal ick vergaren // snel

 

Mijn vruchten, en bewaren // wel

 

Mijn goeden en ghewas,

 

Dan sal ick segghen pas:

 

O ziele lustigh, weest vrolijck onbeswaert

 

Leeft nu gherustigh, eet, drinckt vry onvervaert,

 

Goedt hebt ghy om veel Iaren // siet,

 

Ghy en behoeft te sparen // niet,

 

Ziele maeckt goede chier,

 

⁺Dus sprackt den rijcken ghier.

 

⁺In al dit schicken, siet, seyde tot hem God

+ Psal.52.9.

+ Syr.5.1.

[p. 157]

 

Tot zijn verschricken, in dese nacht, O sot,

 

V Ziele gheeyscht wesen // sal:⁺

 

En wie sal nu van desen // al,⁺

 

Dat ghy al hielt voor dijn,

 

Heer oft besitter zijn?

 

So gaet den genen, die schatten voor hem gaert,

 

Als hy moet henen, hy vindt hem seer beswaert:

 

Want hy in God niet rijck en is,

 

Dus leert ons dees ghelijckenis,

 

Datmen Gods Rijcke soet,

 

T'een noodigh, soecken moet.

+ Iere.17.11

+ Psalm 39.7