Den Lusthof der gheestelicke oeffeninghen

[p. 658]

Twee Lof-sanghen tot den Heylighen Gheest.

I. Veni Creator, &c.

KOmt, o Schepper H. Gheest,

Besoeckt de herten uwer gheloouighen:

Vervult met de gracie van bouen,

De herten die ghy gheschapen hebt.

Die ghenaemt zijt eenen Vertrooster,

Een gaue des alder-hoochsten Godts:

Leuende fonteyne, vier, en liefde,

Ende een gheestelicke saluinghe.

Ghy seuen-voudich in v gauen,

Ghy zijt den vingher der rechter handt Godts.

Ghy zijt die bequame belofte des Vaders,

De tonghen begauende met verscheyden gauen.

Ontsteeckt v licht in onse sinnen,

Instort de liefde in onse herten:

De kranckheden van ons lichaem,

Versterckende met de eewighe kracht.

Verdrijft verre van ons den vijandt,

Gheeft ons haestelick de vrede:

Op dat wy door v voorleydinghe

Schouwen al dat ons beschuldighen kan.

Dat wy door v den Vader kennen,

[p. 659]

Ende oock door v den Sone kennen:

Dat wy altijdt gheloouen, dat ghy

Den gheest zijt van alle beyde.

Glorie zy den Vader, die Heere is,

Ende den Sone, die van der doodt

Verresen is: ende oock den Heyligen Geest,

In de eewen der eewen sonder eynde. Amen.

Veers. Sendt uwen Gheest, ende sy sullen gheschapen worden.

Antvv. Ende ghy sult vernieuwen het aenschijn der aerden.

Ghebedt.

GOdt die door de verlichtinghe des Heylighen Gheests, de herten der gheloouighen gheleert hebt: doet ons in den seluen gheest dat recht is begheeren, ende van sijnen troost altijdt verblijden. Door Christum onsen Heere. Amen.

II. Veni Sancte Spiritus.

KOmt Heylighen Gheest, Laet nederwaerts dalen uyt den hemel,

De stralen uwes lichts.

Komt Vader der armen, Komt ghever der gauen, Komt licht der herten.

Alder-besten vertrooster, Lieflicken gast der sielen, Soete verkoelinghe.

In den arbeydt ruste. Ghetempertheydt in hitte, Troost in het gheween.

[p. 660]

O alder-salichste sicht, Vervult het binnenste der herten, Van uwe gheloouighen.

Sonder uwe godtheydt, En isser niet onder de sonne, Niet en is sonder sonde.

Wascht dat vuyl is, Begiet dat dorre is, Gheneest dat ghequetst is.

Buycht dat stijf is, verwermt dat koudt is, Regeert dat verdoolt is.

Verleent uwe gheloouigen, Die op v betrouwen, V seuen Heylighe gauen.

Gheeft de verdienste der deught, Gheeft een salich af-scheyden, Gheeft de eewighe blijdschap. Amen.

Veers. Sendt uwen Gheest, ende sy sullen gheschapen worden.

Antvv. Ende ghy sult vernieuwen het aenschijn der aerden.

Ghebedt.

GOdt, wien alle herten open zijn, ende alle wille spreeckt, ende gheen secreet verborghen en is: Suyuert door de instortinge des Heylighen Gheests, de gepeysen onser herten: op dat wy moghen verdienen v volkomelick te beminnen, ende weerdichlick te louen, Door Christum onsen Heere. Amen.

Dancksegghinghe tot Godt.

V Godt louen wy, v Heere belijden wy.

V eewighen Vader eert alle aertrijck.

[p. 661]

Alle Enghelen, Hemelen, ende alle Potestaten.

Cherubinnen ende Seraphinnen roepen tot uwer eeren met onversadelicke stemme.

Heylich, heylich, heylich is de Heere Godt der heyrscharen.

De hemelen en aerde zijn vol van de Maiesteyt uwer glorie.

Den gloriosen choor der Apostelen.

Dat loffelick ghetal der Propheten.

Dat blinckende heyr der Martelaren looft v.

De Heylighe Kercke ouer alle den omganck der aerden belijdt v.

Den Vader van seer grooter moghentheyt.

Vwen eerweerdighen, waerachtighen, ende eenighen Sone.

Ende oock den vertrooster den Heylighen Gheest.

Ghy Christe zijt den Koninck der glorien.

Ghy zijt des Vaders eewighen Sone.

Als ghy om den mensch te verlossen de menscheydt soudt aennemen, soo en hebdy des Magets lichaem niet geschroomt.

Ghy verwonnen hebbende de scherpicheyt der doodt, hebt den gheloouighen gheopent dat rijck der hemelen.

Ghy sit ter rechter handt Godts in de glorie uwes Vaders.

Men ghelooft dat ghy zijt den toe-ko-

[p. 662]

menden rechter.

Daerom bidden wy v komt uwen dienaers te hulpe, die ghy met uwen dierbaren bloede ghekocht hebt.

Maeckt dat sy-lieden met uwen Heylighen in de eewighe glorie ghetelt worden.

Heere maeckt v volck salich, ende gebenedijt v erfdeel.

Ende regeertse ende verheftse tot inder eewicheydt.

Van daghe te daghe ghebenedijden wy v.

Ende louen uwen naem inder eewicheydt, ende in eewicheden der eewicheden.

Gheweerdicht v Heere ons in desen daghe sonder sonde te bewaren.

Ontfermt v onser Heere, ontfermt v onser.

Laet ouer ons v bermherticheydt gheschieden, ghelijck wy in v ghehoopt hebben.

In v Heere heb ick ghehoopt, ick en sal niet beschaemt worden in der eewicheydt.

Ghebedt.

O Almachtighen eewighen Godt, wiens bermherticheydt sonder ghetal is, ende wiens schatten aller goedtheydt oneyndelick zijn: wy dancken uwe goedertierenste Maiesteyt, voor de weldaden, die ghy ons oyt ghedaen hebt: uwe ghenade biddende, dat ghy, die voldoet de begheerten der ghemen die v aenroepen, de selue niet en soudt

[p. 663]

verlaten, maer ghenadelick tot den toekomenden loon helpen. Door Christum onsen Heere. Amen.