Den Lusthof der gheestelicke oeffeninghen

Vier Lof-sanghen tot de Moeder Godts Maria.

Lof-sanck, die men ghebruycken sal, van den eersten Sondach van den Aduent, tot onser Vrouvven Lichtmisse dach ghepasseert.

Alma Redemptoris Mater.

HEylige Moeder onse verlossersse, die de open poorte der hemelen blijft, ende eene sterre der zee.

Komt te hulpe die valt, ende soeckt op te staen.

Ghy die ghebaert hebt met verwonde-

[p. 653]

ringhe der nature, uwen Heyligen Schepper.

Maeght voor ende naer de ontfanghenisse.

Die uyt Gabriels mondt ontfangen hebt dat Weest ghegroet, ontfermt der sondaren.

In den Aduent, Veers. Den Enghel des Heeren heeft Maria ghebootschapt.

Antvv. Ende sy heeft ontfanghen van den Heylighen Gheest.

Ghebedt.

WY bidden v, o Heere, stort in onse herten uwe gracie: op dat wy, die door de bootschap des Engels bekent hebben de mensch-wordinghe Christi uwes Soons; moghen door sijn passie ende Cruyce komen tot de glorie der verrijsenisse. Door den seluen Christum onsen Heere.

Antvv. Amen.

Veers. De Godtlicke hulpe blijue altijdt met ons.

Antvv. Amen.

Na Kersmisse. Veers. Ghebaert hebbende zijdy eene onbevleckte maeghdt ghebleuen.

Antvv. Moeder Godts bidt voor ons.

Ghebedt.

O Godt, die door de vruchtbaere maechdelickheydt der saligher Marie, het men-

[p. 654]

schelick gheslachte, gaven der eewigher salicheydt hebt ghegheuen. Wy bidden v, jont ons dat wy haer ghebedt ghewaer moghen worden: door wien wy verdient hebben te ontfanghen den aucteur des leuens, onsen Heere Iesum Christum uwen Sone, die Godt wesende, met v leeft ende regneert in de eenicheydt des Heyligen Gheests, in alle eewen der eewen.

Antvv. Amen.

Veers. De godtlicke hulpe blijue altijdt met ons.

Antw. Amen.

Lof-sanck die men ghebruycken sal van 's daechs na Lichtmisse, tot den auondt voor witten donder-dach.

Aue Regina caelorum.

VVEest ghegroet Koninghinne der hemelen,

Weest ghegroet Vrouwe der Enghelen,

Weest gegroet wortel, weest gegroet deure,

Wt de welcke het licht der wereldt gesproten is.

Verblijdt v gloriose Maghet,

Bouen alle andere de alder-schoonste,

Vaert wel o bouen maten schoone,

Ende wilt Christum voor ons verbidden.

[p. 655]

Veers. Gheweerdicht v, dat ick v loue heylighe Maghedt.

Antvv. Gheeft my kracht tegen uwe vijanden.

Ghebedt.

BErmhertigen Godt, Verleent onse krancheydt hulpe: op dat wy, die ghedenckenisse der H. Moeder Godts houden; door 'tbehulp van haer ghebedt ende middel, van onse sonden moghen opstaen. Door den selven Christum onsen Heere. Antvv. Amen.

Veers. De Godtlicke hulpe blijue altijdt by ons.     Antvv. Amen.

Lof-sanck, die men ghebruycken sal van Paesch-auondt, tot den uyt-ghesloten Saterdach-auondt nae Sinxen.

Regina Caeli laetare.

KOninghinne des hemels verblijdt v, Alleluia.

Want die ghy verdient hebt te draghen, Alleluia.

Is verresen, ghelijck hy gheseydt heeft, Alleluia.

Bidt Godt voor ons, Alleluia.

Veers. Verblijdt ende verheught v H. Maghet Maria, Alleluia.

Antvv. Want den Heere is waerachtichlick verresen, Alleluia.

[p. 656]

Ghebedt.

O Godt, die v gheweerdicht hebt door de verrijsenisse van uwen Sone onsen Heere Iesus Christus, v volck te verheughen: gheeft, bidden wy, dat wy door de Maghet Maria, sijn Moeder de vreuchden des eewighen leuens moghen ghenieten. Door den seluen Christum onsen Heere.

Antvv. Amen.

Veers. De Godtlicke hulpe blijue altijdt met ons.

Antvv. Amen.

Lof-sanck, die men ghebruycken sal van Saterdach-auondt na Sinxen tot den Aduent.

Salue Regina.

WEest ghegroet Koninghe, Moeder der ontfermherticheydt.

Ons leuen, soeticheydt, ende onse hope weest ghegroet.

Tot v roepen wy ballinghen, kinderen van Eua.

Tot v suchten wy kermende ende weenende, in dit dal der tranen.

[p. 657]

Och van onse middelersse, keert uwe bermhertighe ooghen tot ons.

Ende wilt ons na dit ballinckschap Iesum de ghebenedijde vrucht uwes lichaems thoonen.

O saechtmoedighe, O ghenadige, O soete Maghet Maria.

Veers. Bidt voor ons H. Moeder Godts.

Antw. Op dat wy moghen deelachtich worden der beloften Christi.

Ghebedt.

ALmachtighen eewighen Godt, die bereydt hebt door de mede-werckinghe des H. Gheest, het lichaem ende de siele van de gloriose Maghet ende moeder Maria: op dat sy soude moghen verdienen te wesen, eene weerdighe woon-plaetse voor uwen Sone: Gheeft dat wy, die ons verblijden in haer ghedenckenisse, oock moghen door haer godtvruchtighe ghebeden van de aenstaende quaden, ende van de eewighe doodt verlost worden. Door den seluen Iesum Christum onsen Heere.

Antvv. Amen.

Veers. De Godtlicke hulpe blijue altijdt met ons.

Antvv. Amen.