Den Lusthof der gheestelicke oeffeninghen
(1617)–Lodewijk Makeblijde–I. Ghebedt om kennisse sijns staets te verkrijghen.ALmachtighen eewighen Godt, wien kennelick zijn alle beghinselen ende eynden, ende die alle dinghen onberispelick schickt ende regeert: Ick stelle my, ende al dat my aengaet geheelick onder uwe Godtlicke beschickinghe: ende bidde oodtmoedelick door uwe oneyndelicke liefde, met de welcke ghy onse salicheydt bemindt: dat v ghelieue my kennelick te maken, in wat staet van leuen dat ghy begheert van my ghedient te worden: op dat ick dien met eenen blijden moedt, ende vol-komen ouergheuen mijns selfs t'uwer eeren mach verkiesen, ende aenveerden: ende door uwe hulpe in den seluen, alle de daghen mijns levens v ghetrouwelick mach dienen. Amen. | |
[pagina 540]
| |
II. Danck-segghinghe voor de kennisse sijns staets.ALder-bermhertichsten Godt, mijn leven, ende al mijn goedt: Ick loue, eere, ende dancke v in der eewicheydt met alle de krachten mijnder siele: dat ick door uwe hulpe eenen sekeren staet van leuen verkoren hebbe, in den welcken ick v volkomentlick kan dienen, ende behaghen. Gheeft my voordt gracie, ende bequame hulpe, om daghelicks dien beter te kennen, vierichlicker te beminnen, op sijnen tijdt vromelick te aenveerden, ende tot uwer glorie, al mijn leuen in den seluen blijdelick te volherden. Amen. | |
III. Ghebedt om te profijteren in sijnen staet.ALder-mildtsten Heere, saechtmoedighen Godt, van wien komen alle de beste gauen, ende volmaeckste giften: Vermenichvuldicht ouer my de benedictien uwer gracien, ter liefde van alle uwe Heylighen, die dese weereldt victorieuselick ghepasseert zijnde, met v in v rijck leven: op dat ic in mijnen staet, tot den welc- | |
[pagina 541]
| |
ken ghy door uwe goedertierentheydt my gheroepen hebt, daghelicks v soude mogen volmaecktelicker dienen, ende met uwe hulpe in alle deughden gestadelicker voortgaen. Amen. | |
IV. Ghebedt om gheroepen te vvorden van Godt tot eenen volmaeckten staet.O Heere Iesu Christe, Sone des levenden Godts, die ons met woorden ende exempelen de waerachtighe volmaecktheyt gheleert hebt: Ick gheue my gheheelick ouer uwer goedertierentheydt, ende bidde oodtmoedelick met ganscher herten, door de verdiensten uwes lijdens; dat ghy v gheweerdight my tot de selue volmaecktheydt te roepen, ende in die altijdt te bewaren: op dat ick mijn seluen ende de weereldt gestorven zijnde, v alleen in der eewicheydt mach leuen. Amen. | |
V. Ghebedt om alle beletselen der deughden te vervvinnen.ALder-saechtmoedichsten Salichmaker, verlosser mijnder siele: Ick bidde v door v bitter lijden, ende doodt, dat ghy my in bitterheydt wilt verkeeren, allen vleeschelicken troost, die my vervremt van uwe heylige liefde; alle idelheyt ende hoocheydt deser wee- | |
[pagina 542]
| |
reldt, die my af-trecken van de oodtmoedicheydt uwer cruyce; alle in-blasinghen des serpents, die my tragher maken in uwen dienst, ende beletten in mijnen roep. Gheeft my oock gracie, om de bekoringhen der vijanden mijnder siele te kennen: vromicheydt, om die te weder-staen: lijdtsaemheydt, om die te verdraghen: ende ghestadicheydt, om in de ghehoorsaemheyt uwer wet, ende volmaecktheydt van mijnen roep tot het eynde mijns leuens toe, te volherden. Amen. |
|