Den Lusthof der gheestelicke oeffeninghen

Vier
Vermaninghen, op dese korte weghen, om die wel te ghebruycken.

Dese korte vveghen der volmaecktheydt suldy moghen ghebruycken op vier verscheyden manieren.

DE eerste is. Neemt daghelicks een van die, ende druckt die vastelick in uwe memorie: daer nae doet dese dry dinghen.

1.	Bemerckt den dach ouer, wat v daer gheleert wordt.
2.	Bidt Godt, om door sijne gratie dat te verkrijghen, ende arbeydt dat volkomelick te volbrenghen.
3.	Bedroeft v dat ghy dit, soo laet bemerckt, ende noch niet te vullen, na de gratie, die v gheschiedt, behert.

Eyndelick vervolght alsoo d'eene na d'andere, tot dat ghy

[p. 85]

die al ghebruyckt sult hebben: ende beghint dan wederom. Wilt ghy na den noen veranderen, ende daghelicks twee van dese korte weghen ghebruycken, dat kan oock gheschieden

De tvveede is, Voor de ghene die daghelicks mediteren, dat sy dese korte weghen moghen ghebruycken, voor de materie van hunne meditatie.

De derde is, Dese korte weghen ghebruycken tot maendelicke Suffragien, om die een ieghelick van den huyse uyt te deelen. Dit sal op dese maniere gheschieden: Neemt soo veel briefkens alsser persoonen in huys zijn, ende schrijft op elck, dese dry dinghen. 1. Eenen sekeren dach van de maendt, met de name van eenen Heylighen diemen op dien dach viert. 2. Een van dese korte weghen. 3. Het ghene daer sy voren moeten bidden: te weten: den naem van eenen des huysghesins ende eenighe ghemeyne saecke.

Dese briefkens suldy op deser voeghen uytdeylen.

Den laetsten dach van elcken maendt, sullen die van den huyse t'samen vergaderen: ende ghebeden hebbende, eene die daer toe ghestelt is, sal alle de namen des hysghesins, besonderlick, soo sy in de briefkens daer sy in gheschreuen zijn, in de handt komen, aenhoorlick lesen. Elck sijn naem hoorende, sal gaen knielen ter bequame plaetse, ende van eenen anderen sijn briefken soo't in de handt comt, hooren lesen, ende oodtmoedelick ontfanghen: Voordts manierelick opstaen, ende andere plaetse maecken: niet uytgaen nochtans voor sy al ghegheuen zijn.

[p. 86]

Vorme van dese briefkens te schrijuen.

Den 21. September Sinte Mattheus Apostel.

Sluyt v herte met dry sloten.
1. De vreese Godts. 2. Lijdtsaemheydt. 3. Ootmoedicheydt.

Bidt voor de ghene, die in doodt-sonde leuen, ende Ian vander zee.

De vierde is, Stelt in verscheyden plaetsen van uwe kamer seuen Heylighen, tot de welcke ghy aldermeest deuotie hebt: ende eert op elcken dach eenen, ende ontfanght als van hem voor eene salighe lesse eenighe van dese vermaninghen; om die tot sijnder eeren, ende door sijne besondere hulpe dien gheheelen dach te oeffenen.