Den Lusthof der gheestelicke oeffeninghen

[p. 87]

Vier
Verscheyden manieren, om daghelicks de H. Passie Christi te eeren.

De eerste maniere.

MEn leest in de levenen der Heyligher Vaderen, datter eenen weerdighen Religieus gheweest is, die van sijne kindtsche daghen, groote deuotie tot de Passie onses Salichmakers in hem ghevoelde, ende daghelicks tot Christus aen het Cruys, dese oeffeninghe ghebruyckte: VVy aenbidden v Christe, ende ghebenedijden v: vvant ghy door v Cruys, de vvereldt verlost hebt. Diepe eere bewijsende met den hoofde, ende lesende eenen Pater noster ende Aue Maria, met dit ghebedeken: Gheeft my, o Iesu, door v bitter lijden, bloedt, Cruys ende doodt, uvve Goddelicke vreese, ende doet my door die, alle sonden laten, ende ontsteeckt in my het vier uvver liefde, om v in alle deuchden na te volghen. Als desen Heylighen Religieus nu was in sijn uyterste, Christus heeft hem sienelick komen besoecken, ende uyt de vijf wonden, sijns lichaems ouervloedighe soeticheydt laten drincken.

[p. 88]

De tweede maniere.

REyst elcken dach van de weke door de weghen, daer Christus sijn swaer Cruys ghedraghen heeft, tot den berch van Caluarien: ende knielende voor het Cruys Christi, leest met deuoter herten, de seuen bloedt-stortinghen. Oft groet de vijf wonden, die Christus aen het Cruys ontfanghen heeft, met alle de andere, die Christus in sijn ghebenedijt lichaem ghedraghen heeft. Ende bidt dat hy v van den salighen prijs sijns lijdens wil deel-achtich maken.

Ghebeden tot de wonden Christi.

O Lieuen Heere Iesu, ick groete in alle oodtmoedicheydt ende danckbaerheydt mijns herten, de Heylighe wonde van uwe rechte handt: die seer wreedelick doorboort is gheweest aen den Cruyce met eenen plompen naghel: laet de salighe vloeten van die wonde ouer mijne siele komen, ende haer suyueren van alle vuylicheydt der sonden: wilt my deel-achtich maken haerder verdiensten, ende ter liefden van die, my, na dit leuen, onder uwe uytverkoren aen uwe rechte handt setten: want ghy alleen, o Heere mijnen ver-

[p. 89]

losser ende mijnen Salichmaker zijt. Pater noster, Aue Maria.

O lieuen Heere Iesu, ick groete in alle oodtmoedicheydt ende danckbaerheydt mijns herten, de heylighe wonde van uwe slincke handt, die met groot ghewelt van slaghen, ende onverdraghelicke pijne aen het Cruyce ghenaghelt is gheweest. Maeckt my deelachtich haerder verdiensten, ende ontfanght my, door uwe bermherticheydt, in gratie: want ick uyt mijn seluen, dier allesins gheheel onweerdich ben. Pater noster, Aue Maria.

O lieuen Heere Iesu, ick groete in alle oodtmoedicheydt, reuerentie, ende danckbaerheydt mijns herten, uwe Coninclicke zijde, die seer wreedelick doorsteken is gheweest met eene sperre, uyt de welcke vloeydde water ende bloedt. Wilt my haerder verdiensten mildelick deelachtich maken, ende openen v lieflick herte, tot mijn toevlucht in alle swaricheydt, ende tot eene sekere hope van het eewich leuen. Pater noster, Aue Maria.

O lieuen Heere Iesu, ick groet in alle oodtmoedicheydt ende danckbaerheydt mijns herten, de Heylighe wonde van uwen rechten voedt. Wilt door hare salighe vloeten mijne siele van alle ghebreken suyueren, haerder kostelicker verdiensten deelachtich maken, ende voordts, my, door den rech-

[p. 90]

ten wech uwer ghehoorsaemheydt, tot het eewich leuen leyden. Pater noster, Aue Maria.

O lieuen Heere Iesu, ick groete in alle oodtmoedicheydt ende danckbaerheydt mijns herten, de Heylighe wonde van uwen slincken voedt, de welcke is eene fonteyne der troost ende ghenaden voor alle bedruckte sielen. Maeckt my deelachtich haerder verdiensten, ende laet hare salighe vloeten mijne siele door-loopen, ende in alle deughden vruchtbaer maken: op dat ick uwe Heylighe voedt-stappen altijdt mach na volghen. Pater noster, Aue Maria.

O lieuen Heere Iesu, ick groete in alle oodtmoedicheydt ende danckbaerheydt mijns herten, alle de wonden van v ghebenedijt lichaem, in't welcke niet en was sonder pijne ende onghescheurt. Maeckt my deelachtich der oneyndelicke schatten uwer verlatentheydt ende groote liefde: Leert my ter liefde van v, my seluen versteruen, ende in het verlaten mijns selfs v vinden, ende in v eewichlick leuen. Pater noster, Aue Maria.

Ick offere v oock, o Heere, mijn eyghen seluen, met alle de ghepeysen, woorden, ende wercken van gheheel mijn leuen in de eenicheydt van alle uwe wonden, pijnen, verlatentheydt, ende verdiensten. Voldoet, o goeden Salich-maker, voor my, al dat ick me-

[p. 91]

nighvuldighlick versuymt hebbe, ende betaelt voor my, al dat ick schuldich blijue: maeckt my oock door uwe gratie, sulck een mensch als ghy begheert, dat ick inder eewicheydt door uwe gratie om v te behaeghen wesen sal. Amen.

De derde maniere.

NEemt seuen beelden, der seuen plaetsen, daer Christus alder-meest gheleden heeft: als zijn: 1. Het Hofken. 2. Het huys van Annas. 3. Van Cayphas. 4. Van Pilatus. 5. Van Herodes. 6. Den wech tot den berch van Calvarien. 7. Den berch van Calvarien. Hanght dese beelden in verscheyden plaetsen van v kamer, ende doet daghelicks v deuotie voor een van die, beghinnende van het eerste, ende alsoo met die daghen van de weken gaet voordt tot den eynde toe. Ende blijft elcken dach met Christo, in die eene plaetse, v oeffenende met alle danckbaerheydt, in de ghedachtenisse der pijnen ende lasteringhen, die Christus voor v daer gheleden heeft.

Die gheene beelden en konnen krijghen, moghen pampieren nemen, ende in elck schrijven, wat dat Christus in elcke plaetse gheleden heeft. Het welck men oock kan teeckenen onder de beelden, om de memorie beter te helpen.

[p. 92]

De vierde maniere.

DEelt de H. Passie Christi in een-en-dertich deelen, ende groet daghelicks een van die, soo sult ghy maendelick de gheheele Passie Christi eeren. Alsser min daghen komen in de maendt, ghedenckt twee oft dry deelen t'samen op eenen dach, op dat ghy gheen achter en laet. Op deser voeghe:

Eerst, Mediteert, wat dat Christo dan gheschiedt is, ende wat dat hy gheleden heeft.

Ten tvveeden, Danckt Christum, dat hy hem gheweerdicht heeft voor v dat lijden aen te nemen.

Ten derden, Offert v seluen, ende al dat dien dach passeren sal, oft ghepasseert is, in de eenicheydt van dat mysterie sijns lijdens, tot sijnder eere.

Ten vierden, Bidt, om eenighe sekere sonde te laten: ende eenighe sekere deught te verkrijghen: om Gode in alles te behaghen: ende om een salich eynde te verweruen.