Den Lusthof der gheestelicke oeffeninghen

Ghebeden
voor de dry tijden des daeghs, als de bede-klocke klept.

's Morghens.

GRoet de H. Moeder Godts Maria, met dese navolghende dry ghebeden, ende dry Aue Maria, ter eeren van de Enghelsche boodschap, ende vande mensch-wordinghe ende verrijsenisse Christi.

Dat eerste Ghebedt, als 't eerst klept.

O Moeder der ontfermherticheydt Maria: Ick groete den Tempel van v Heylich lichaem, in het welck den Sone Godts mensch gheworden is, ende neghen maenden gherust heeft. Aue Maria.

[p. 47]

Dat tvveede Ghebedt, als 't de tvveede reyse klept.

O Goedertieren Patroonesse der wereldt Maria. Ick groete v Maeghdelick herte, dat noyt met eenighe vlecke besmet is gheweest; maer is altijdt, van godlicke liefde vol gheweest. Aue Maria.

Dat derde Ghebedt, als 't de derde reyse klept.

O Weerdighe Coninghinne des hemels Maria: Ick groet uwe H. siele, verciert met alle deughden: Wilt my wesen in de ure mijnder doodt, eene ghetrouwe voorsprakersse, by uwen lieuen Sone. Aue Maria.

Ghebedt.

O Heylighe uytverkoren Maghedt, ende Moeder Godts Maria: Ontfanght goedertierlick van my arm sondich mensch, het heylich woordt, dat v van den hemelschen Vader, door den Enghel Gabriel verkondicht is: ende bidt voor ons, dat ghelijck hy v vervult heeft met gratie, ons oock wilt helpen; om voordt te gaen in den wech der salicheydt, ende met v hier namaels de vreucht des eewighen leuens te verkrijgen. Amen

[p. 48]

Ter Noen tijdt.

Groet de Moeder Godts Maria, met de selue dry ghebeden, ende met dry Aue Maria, ter eere van Christi bitter lijden, ende dat hy aen het Cruys dry uren hanghende ghestorven is.

Ghebedt.

AEnsiet, o hemelschen Vader, met de ooghen uwer ghenade, my uwen dienaer: voor den welcken Iesus Christus uwen lieven Sone, in de handen sijnder vijanden gheleuert is gheweest, ende de bittere doodt hanghende aen het Cruys gheleden heeft. In uwe handen beuele ick mijne siele ende lichaem, mijne sinnen ende raedt, mijnen noodt, weelde, vreese, betrouwen, den gheheelen loop mijns leuens, ende mijn steruen, midtsgaders de verrijsenisse ende salighe ruste mijnder siele. Amen.

's Auondts.

Groet de Moeder Godts Maria, met de selue dry ghebeden, ende met dry Aue Maria, ter eere van de begrauenisse Christi, ende alle sijne verdiensten.

[p. 49]

Ghebedt.

O Goedertieren Salichmaker Iesu, Sone des leuenden Godts, Wilt bermhertelick v lijden, bloedt, cruyce, ende bittere doodt, stellen tusschen v oordeel, ende mijne misdadighe siele, nu ende in de ure mijnder doodt. Gheeft alle sondighe menschen leedtwesen hunder sonden, de rechtveerdighe vermeerderinghe hunder deughden, de ouerleden eewighe ruste, uwe Heylighe Kercke waerachtighe eendrachticheydt, ende ons de vol-maecktheydt uwer liefde. Amen.