Tot alle devote zielen, die na den Hemelschen Handel trachten.
COmt hier Adams gheslacht, hoe langh sult ghy beminnen
Dees werelts ydel schijn? vergadert eens uw' sinnen:
Vergadert u ghemoet: en siet, hoe u bedrijff,
V woelen, u ghejach, gansch niet en heeft om 'tlijff.
T'is loghentael dat sy soo schoon u staet voor ooghen:
Als ghy't vercreghen hebt, soo vindy u bedrooghen.
Exempel aen dien Helt by u soo seer gheacht,
Dien Alexander groot: en wert hy niet belacht,
Ter oorsaeck dat hy als een kint, oft vrouwe weende,
Om datter werelden meer waren, dan hy meende?
En was dat niet gheseyt: waer toe heb ick ghewrocht?
Hoe kleyn ist, dat ick met sweet, en bloedt heb ghecocht?
Het Persiaensche Rijck, het Rijck van Porus mede
En mochten desen bloet noch niet stellen te vrede.
Mijn vrienden, 'tis alsoo: al watmen hier aenschout,
Scepters, croonen royael, ghesteenten, peerlen, gout,
Het mach sijn minnaers wel met swaere packen laden,
Maer 'tkan des menschens hert ten vollen niet versaden.
T'is vry een grooter wer'lt, een beter wer'lt ist,
Daer wy 'tschip moeten he'en na wenden onghemist.
Den wapen-handel, om dit edel Rijck te winnen,
Leert u dit boecxken cleyn van bladen, vol van sinnen.
Couragie, grijpt noch moet, steect vroomlijc na die croon,
Die u van Godt bereyt is tot een eeuwich loon,
Soo verr' ghy d'ydelheyt en loghentael wilt haten,
En desen Handel hier aennemen t'uwer baten.
I. VVaterfoordt.
|
|
Auteursrechtvrij