Der lijden vreucht

In houdende, eenighe geestelijcke liedekens

[p. 82]

Een Liedeken,

Op de Wyse: Sal ick noch langer in heete tranen,

'k WEnsch u de gracy Gods van boven,
Op dat ghy doch u edel jeucht,
Besteet om u Schepper te loven,
Bewijst hem danck met ware deucht,
En went u niet, nae geen ghy siet,
Maer keert u Hert daer 't hene wesen moet,
Na d' oorspronck en Fonteyn van alle goet,

2. 't Verstant, Memory, kracht en sinnen,

Dat heeft u God uyt Liefd' gejont,
Om dat ghy hem daer mee sout minnen,
Vervreyt sijn lof met hert en mont,
Laet u Ieuchts bloem tot Godes roem,
Op wassen in deucht altijt meer en meer,
Hebt al u lust in Godes wet en leer.

3. Bewijst u vriendelijck en goedich,

Tegen al die met u verkeert,
Weest altijt nederich sachtmoedich,
Op datmen uyt u wesen leert,
En u doch draeght, als een wijs Maecht
Op dat ghy met u Heere meught in gaen,
En als de dwase niet blijft buyten staen.

4. Al dat ghy siet dat moet verdwynen,

Gelijck een roock vergaet subijt,
Maer laet Gods gracy in u schijnen,
Op dat ghy doch voorsichtich sijt,
Daer is geen rust, in d' Aertsche lust,
Saligh is hy die 't hem in tijts ontslaet,
En soeckt een vreucht die nimmermeer vergaet.

Liefd' verwint.