Kribbelkes. Gediechskes in 't Mastreechs

[p. 88]

Hèllig Treeske.

Hèllig Treeske

diene naom is wie e gleeske

vaan 't zuverste kristal,

boe de klaank vaan is wie belkes

en 't leechspeul wie de krelkes

vaan 'ne groete waterval.

Hèllig Treeske

diene naom is wie e feeske,

gruutsig speul vaan 'n fontein,

sjitterend wie diamante,

zondoorsjijnd vaan alle kante,

meh invoudig toch en klein.

Hèllig Treeske

maak veur us ouch ins e feeske.

Seer dat sjoen mèt ruuskes op,

geef us daan 'ne roezerege,

daan haw iech ei ruuske tege

en iech vaang 't zeker op.

Hèllig Treeske

'ch zèt dat ruuske in e veeske

en bewaor 't stèl veur miech.

En es wat iech vraog maag lökke,

zal iech hiel väöl ruuskes plökke

allemaol allein veur diech.