Kribbelkes. Gediechskes in 't Mastreechs

[p. 73]

Slevrouwe Leechmès.

't Evangelie gief vaandaog

Us weer e sjoen ekzempel:

Ze goonge vaan oet Nazareth

Gedreije nao d'n tempel.

Sint Zjoezep droog de offergaof

Twie doeve in e kuike,

Dat sjreef de joedse wèt zoe veur

Es zuuvring vaan Slevruike.

Slevruike zellef droog 't Keend,

't Wiechske vaan e mäöndsje,

Gods Keend, aon häör noe touwvertroujd,

Gods Keend, meh ouch häör zäönsje.

Zie zou 'm leije wie ze kôs,

Dat goong z'opnui belaove

Noe wie ze nao d'n tempel goong

En offerde häör gaove.

Häör gaove, twie klein doeve mer

Wie alle errem luikes...

Toen goong me trök en leefde stèl...

Zien nog vaan die Slevruikes?

Zien nog Sint Zjoezeps, die wie toen

Zoe klein, invoudig blieve?

Zouw'veer es awwers vaan zoe Keend

Us neet get aanders sjrieve?

Dat veurbeeld vaan oet Nazareth

Maag dat in doonker tije

Zoe wie veer ze beleve noe

Us rech-aon blieve leije,

En laote weure, zoe wie zie

Dao waore in d'n tempel,

Invoudig, braaf en stèl, zoe wie

Me zeet: vaan awwe stempel.