Een nieu liedt-boeck genaemt den druyven-tros der amoureusheyt
(1602)–Pieter Lenaerts van der Goes–
AuteursrechtvrijIn hem begrijpende veelderhande amoureuse liedekens, te vooren in druck noyt uytgegaen
op eenen ouden Bessem, Op de wijse: Al naer sy gebaert ,, recht naer den aert.
CLara schoon lief //
Mijns sins gerief //
Met gaven vast deurbonden //
V ick verhief //
Ghelijck een brief //
Privatetelick ghesonden //
Ick heb aen u bevonden //
Een reynelicke daet //
Laudaten vuyl om gronden //
Die liever ledich
| |
[pagina 161]
| |
 stonden //
Hebben u meest inden haet.
Ghy swijght, en heelt,
Wanneer ghy speelt
Int heymelick u cuere:
Die u (reyn beelt)
Ten dienste steelt,
Doet ghy een trouwe huere:
Bereedt in t'soet, en t'suere,
Tot alle cleynicheyt,
Ghy ontmoet (op een uere)
Meenigh schoon auontuere,
Doch in alder reynicheyt.
Sedich, en cuys
Zijdy in huys
Gelijck een maeght van state:
Du mard', of gruys
En sulck gespuys,
Drijft ghy al wt den gate:
Al vondy staen op strate
Een stut, aen uwen post,
Hy pautert daer niet late,
T'is hem een cleene bate,
Al heeft hy wat veel gecost.
Jonckvrouw Ramot
Waerom bespot,
V menich sassem clicke:
Al laeght becrot,
In eenich cot,
Bynaest thien duymen dicke,
Men braker hals, en nicke,
Ten waer deur u gedaen:
Daerom sult ghy, en icke,
Gelijck manckaert, en cricke,
Achter huyse t'samen gaen.
Wie peynsde, doen
Ghy noch waert groen,
Ja, als heyden vertreden,
Dat ghy so coen
(Als een slavoen)
| |
[pagina 162]
| |
Sout schicken u teer leden,
En of ghy wat vergleden
In u ouderdom wort,
Moet ghy (tot allen steden)
Van maren zijn bereden,
V geschiet seer veel te cort.
Prince.
Wat rester meer,
Prince noch heer,
Heeft noyt u nest beslopen,
Ghy liept veel eer,
Ter hulpe seer,
Daer toe ghy waert geropen:
Van u was veel te hopen,
Sijnde bysonder // sterck,
Hebdy veel weeghs gecropen,
Nu doedy mussels open,
Och ist niet een wonder // werck.
Doende leer-ick. |
|